Ўзбекистон инвестициялар, саноат ва савдо вазири Лазиз Қудратов 7 март куни Осиё инфратузилмавий инвестициялар банки (ОИИБ) вице-президенти Людгер Шукнехт билан учрашув ўтказди. Бу ҳақда вазирлик матбуот хизмати хабар берди.
Суҳбат чоғида Ўзбекистон президентининг январь ойида ОИИБ бош қароргоҳига ташрифидан сўнг сезиларли даражада фаоллашган ОИИБ ва Ўзбекистон ўртасидаги икки томонлама муносабатларнинг ривожланиш динамикаси қайд этилган.
Ташриф якунлари бўйича 2024—2026 йилларда Ўзбекистон ва ОИИБ ўртасида умумий қиймати 2,5 млрд долларлик қўшма лойиҳаларни молиялаштириш бўйича ҳамкорлик дастури ҳамда ОИИБ Бошқарув кенгашининг йиллик йиғилишини 2024 йил 25—26 сентябрь кунлари Самарқанд шаҳрида ўтказиш тўғрисидаги меморандум имзоланган.
Томонлар лойиҳаларнинг амалга оширилиши, шунингдек, 2024—2026 йилларга мўлжалланган ҳамкорлик дастурига киритилган энергетика, қишлоқ хўжалиги, транспорт, соғлиқни сақлаш ва сув таъминоти соҳаларида янги ташаббусларни биргаликда ҳаётга татбиқ қилиш истиқболларини кўриб чиқди.
ОИИБ Бошқарувчилар кенгашининг 2024 йилда Самарқанд шаҳрида ўтказиладиган 9 йиллик йиғилишига тайёргарлик кўриш масалалари алоҳида муҳокама қилинган. Турли мамлакатларда роадшоу ва тақдимотлар ташкил этиш, тадбирнинг ташкилий ва мазмунига доир масалалари бўйича қўшма “Йўл харитаси”ни ишлаб чиқиш режалаштирилган.
Изоҳ (0)