Ўзбекистонда Марказий Осиёда биринчи бўлиб гидроаккумуляторли электр станция қурилади. Бу ҳақда Тошкентдаги гидроэнергетикага бағишланган саккизинчи халқаро анжуманда маълум қилинди.
-_3Tfbq-m.jpg)
“Ўзбекгидроэнерго” АЖ масъули Нодирбек Акчабоевнинг билдиришича, Ўзбекистонда дастлаб 4 та гидроаккумуляторли электр станциялар барпо этилади. Ушбу лойиҳа Марказий Осиёда биринчи марта амалга оширилаётган бўлиб, улар мамлакатнинг Жиззах, Тошкент вилоятлари ва Қорақалпоғистон республикасида жойлаштирилади. Уларнинг умумий қуввати 1600 МВт ни ташкил қилади.
Тошкент шаҳрида иш бошлаган саккизинчи халқаро анжуманда Ўзбекистон, Тожикистон, Қозоғистон, Қирғизистон, Озарбайжон, Эрон, Арманистон, Россия, Грузия ва Туркия давлатларидан вакиллар қатнашмоқда.
Ушбу халқаро анжуман Ўзбекистонда иккинчи маротаба ташкил этилмоқда. Бундан аввал Ўзбекистон 2021 йил февраль ойида шу нуфузли халқаро анжуманнинг бешинчисига мезбонлик қилган эди. Анжуман минтақалардаги гидроэнергетика соҳасининг ривожланиши ва тараққий этиши, гидроэнергетик иншоотларнинг қурилиши, модернизацияси, муаммо ва истиқболлари бўйича ўзига хос ўзаро тажриба алмашиш, узвий ҳамкорлик ва мулоқот майдони ҳисобланади.
Изоҳ (0)