“Толибон” темирйўл бошқармаси бошлиғи Тошкентга келди

Афғонистон миллий темирйўл бошқармаси бошлиғи мулла Бахт ул Раҳмон Шарофат Ўзбекистонга ташриф буюрди. Бу ҳақда Аvapress хабар берди.

Делегация Трансафғон лойиҳаси йиғилишида иштирок этиш ва икки томонлама ҳамкорликни кенгайтириш мақсадида Тошкентга ташриф буюрган. Тегишли учрашув 19 февраль куни Афғонистон, Покистон, Ўзбекистон ва Бирлашган Араб Амирликлари вакиллари иштирокида ўтказилиши режалаштирилган.

27 декабрь куни Ўзбекистон транспорт вазири Илҳом Маҳкамов Афғонистон транспорт ва фуқаро авиацияси вазири вазифасини бажарувчи Ҳамидулло Охунзода бошчилигидаги делегация вакиллари билан учрашув ўтказган эди.

Учрашувда томонлар транспорт ва логистика соҳасидаги ҳамкорлик алоқаларини ривожлантириш мақсадида қатор масалаларни муҳокама қилган. Хусусан:

• автомобиль ташувларида ундириладиган йиғим ва тўловларни паритет асосида ундирилишини таъминлаш;
• Афғонистон ҳудуди орқали транзит ҳамда икки томонлама ташувларни ривожлантириш;
• темирйўл ташувларидаги тариф ставкаларига имтиёзлар тақдим этиш.

Шунингдек, томонлар Ўзбекистон—Афғонистон—Покистон темирйўл қурилиши лойиҳасини жадаллаштириш билан боғлиқ масалаларни муҳокама қилган эди.