Сурхондарё вилояти Ангор туманида алимент тўламай, 2 йилдан буён қидирувда бўлган эркак уй ертўласидан топилди. Бу ҳақда МИБ ахборот хизмати “Дарё”га хабар берди.
Хабарга кўра, Мажбурий ижро бюроси Сурхондарё вилоят бошқармаси қидирув шўбаси инспекторлари ҳамда бюронинг Ангор туман бўлими томонидан олиб борилган навбатдаги тадбир давомида фарзандининг моддий таъминотидан бўйин товлаб, икки йил муқаддам қидирувга берилган қарздор ота яшаш хонадони ертўласидан топилди.
Ангор туманида яшовчи фуқаро Ф.М. турмуш ўртоғи билан ажрашгандан сўнг, 2019 йил январь ойидаги суд буйруғига асосан вояга етмаган 3 нафар норасида фарзандларининг моддий таъминотига масъул этиб белгиланган. Бироқ қарздор ота алимент тўлашдан бўйин товлаб келган.
Қидирувда бўлган қарздор ҳақида олинган маълумотлар асосида Мажбурий ижро бюроси Ангор туман бўлими давлат ижрочиси бўлиб ишлаб келаётган Сайёра Тожиева қарздорнинг яшаш манзилига бориб, яқинларига ижро иши ҳақида тушунтириш берган. Бу тушунтиришлар кор қилмагани сабабли хонадондаги қорамол хатловга олиш жараёнида кутилмаган ҳолат юз берган.
Молидан айрилишини истамаган хонадон эгалари қарздорни уйнинг ертўласида яшириниб олганини билдирди. Мазкур иш жиноят ишлари бўйича Ангор туман судида кўриб чиқилиб, 51 миллион сўмдан ортиқ алимент қарздорлиги сабаб эркакка 15 суткалик маъмурий қамоқ жазоси тайинланди.
Изоҳ (0)