Ғазо секторига инсонпарварлик ёрдами етказиб беришни кўпайтириш мақсадида вақтинчалик порт қуриш учун жиҳозланган Америка кемаси Ўрта Ер денгизига йўл олди. Бу ҳақда АҚШ Қуролли Кучлар Марказий Қўмондонлиги ахборотига таяниб, Deutsche Welle хабар берди.
Хабарга кўра, АҚШ ҳарбий-денгиз кучларининг General Frank S.Besson кемаси 9 март куни Ленгли-Эустис базасини тарк этиб, муҳандислар ва зарур жиҳозларнинг биринчи жўнатмасини олиб, шарқий Ўрта Ер денгизи томон йўл олган.
Маълум бўлишича, вақтинчалик порт икки ой ичида қурилиши мумкин, қурилишда мингга яқин ҳарбий хизматчи иштирок этади. У Ғазода вақтинчалик бошпана қуриш учун зарур бўлган инсонпарварлик юклари, жумладан озиқ-овқат, дори-дармон ва қурилиш материалларини олиб кетаётган кемаларни қабул қилади.
Аввалроқ АҚШ президенти Жо Байден Исроил бош вазири Бенямин Нетаньяхунинг Ғазо секторидаги ҳарбий амалиётни давом эттириш бўйича позициясини яна бир бор танқид қилган эди.
Менимча, у Исроилга ёрдам беришдан кўра кўпроқ зарар келтирмоқда, бутун дунёни Исроил тарафдори бўлишга қарши чиқиш учун мажбур қилмоқда. Мен буни катта хато деб ҳисоблайман, — дея таъкидлаган АҚШ раҳбари.
7 март куни Конгрессга мурожаатида Байден фаластинликларга гуманитар ёрдам етказиш учун Ғазо секторида вақтинчалик порт қуриш ташаббусини илгари сурган эди. У қурилишда америкалик ишчилар бўлмаслигини таъкидлаган. Хавфсиз денгиз коридорини яратиш лойиҳасида Европа Иттифоқи, Бирлашган Араб Амирликлари ва бошқа давлатлар ҳам иштирок этмоқда. Ғазо секторига инсонпарварлик ёрдамини етказиб беришни кўп ойлардан бери ташкил этишга уринаётган Кипр асосий рол ўйнайди. Гуманитар юклар Ларнакадан денгиз орқали Ғазо секторига етказилиши кутилмоқда.
Вақтинчалик ечим сифатида гуманитар ёрдамни Ғазо сектори қирғоқлари яқинида йирик кемалардан кичик кемаларга қайта юклаш ёки аввал Ғазога ташиш учун Исроил ва Мисрга гуманитар юкларни етказиб бериш таклиф қилинмоқда.
Изоҳ (0)