Туркия президенти ҳузуридаги Коммуникация бошқармаси бошлиғи Фаҳреттин Алтун Исроил бош вазири Биньямин Нетаньяхунинг ишини қоралашини маълум қилди. Бу ҳақда у ижтимоий тармоқдаги расмий саҳифасида ёзган.
Тарих Нетаньяхуни бу минтақа учун ҳам, ўз мамлакати учун ҳам энг таҳликали раҳбар сифатида баҳолади. Ўз юрти, тинчлик ва фаровонлик йўлида ўз жонига қўшиб ҳамма нарсани фидо қиладиган раҳбарлар бор. Улар ўз фуқароларининг турмушини яхшилаш, қўшнилар билан яхши муносабатда бўлиш йўлида кеча-ю кундуз меҳнат қилади. Улар глобал ишларда ҳақиқат ва адолат тарафдори бўлишади, чунки улар елкаларидаги тарихий масъулиятни тан олишади, — дейди Туркия президенти ҳузуридаги Коммуникация бошқармаси бошлиғи Фаҳреттин Алтун.
Фаҳреттин Алтун Исроил бош вазири Биньямин Нетаньяхуни мамлакати учун шарманда бўлган шундай лидерлардан бири дейди.
Ўз ғаразли сиёсий мақсадлари учун умуминсоний қадриятлар ва одоб-ахлоқни ҳам қурбон қиладиганлар бор. Улар ўз ишғоли остида яшаётганларнинг ҳаётини йўқ қилиш режаларини ўйлаб топиш учун кеча-ю кундуз ишлайдилар. Улар доимо ўз қўшниларида беқарорлик, можаро ва урушларни келтириб чиқаради. Улар адоласизликни давом эттирадилар, чунки улар ўзлариникидан бошқа бировнинг фаровонлиги ҳақида қайғурмайдилар. Нетаньяху ўз мамлакати учун шарманда бўлган шундай лидерлардан биридир. Нетаньяхунинг қотил уруш маҳкамаси глобал кучлардан қанчалик кўп қўллаб-қувватланмасин, у бу минтақада тинчлик ва барқарорлик умидларини пучга чиқарган, бутунлай муваффақиясизликка учраган лидер сифатида тарихга киради. Бу ҳақиқатни ўзгартириш учун у ҳеч қандай сиёсат қила олмайди, — дейди у.
Сиёсатчи Нетаньяху ва унинг ҳукумати олиб бораётган этник тозалашдан фаластинликлар жуда кўп жабр кўрганини билдиради.
Нетаньяху ва унинг ҳукумати олиб бораётган этник тозалаш натижасида фаластинликлар жуда кўп жабр кўрди ва азоб чекишда давом этмоқда. Биз бор кучимиз билан унинг сиёсатига қарши чиқишда давом этамиз. Унинг ёлғонлари, алдовлари, ёлғон айбловлари ва кун тартибимизни ўзгартиришга уринишлари бизни қўрқитмайди.
Туркия сифатида президентимиз Эрдоған бошчилигида Фаластинда ҳақиқат, адолат ва деколонизация тарафдори бўламиз. Биз адолатли ва якуний резолюция учун ҳаракат қиламиз, бу икки давлат ечими деб ҳисоблаймиз. Ва биз фаластинлик биродарлар ва опа-сингилларимиз билан тўлиқ бирдамликда бўлишни давом эттирамиз, — дейди Туркия президенти ҳузуридаги Коммуникация бошқармаси бошлиғи Фаҳреттин Алтун.
Аввалроқ Исроил бош вазири Биньямин Нетаньяху мамлакатга халқаро ҳамжамият томонидан босим кучайиб бораётганига қарамай ҲАМАСга қарши урушни, жумладан Ғазо сектори жанубидаги ҳарбий амалиётини давом эттиришини айтганди.
Халқаро босим бор ва у кучаймоқда, лекин халқаро босим кучайганда, биз бирлашишимиз керак, урушни тўхтатишга уринишларга қарши туришимиз керак, — деганди Нетаньяху.
Изоҳ (0)