Бухорода ўриндиқлари тешик аттракцион борлиги ҳақидаги хабарлар рад этилди

Бухоро шаҳар ҳокимлиги шаҳарда ўриндиқлари тешик бўлган чархпалак аттракциони борлиги ҳақидаги хабарларни рад этди.

Ижтимоий тармоқларда “ажал чархпалаги” дея носоз ҳолдаги аттракцион тасвири акс этган видео тарқатилиб, у Бухоро паркларидан бирида эканлиги ёзилган.

Шаҳар ҳокимлиги матбуот хизмати бу маълумотлар ҳақиқатга тўғри келмаслигини, Бухородаги паркларда бундай носоз ҳолдаги аттракционлар, хусусан, носоз ҳолдаги чархпалак мавжуд эмаслигини маълум қилди.

Шунингдек, Сомонийлар маданият ва истироҳат боғидан ўрин эгаллаган чархпалак суратларини илова қилди.

Ҳокимлик матбуот хизмати ижтимоий тармоқ фаолларидан текширилмаган ва ёлғон маълумотлар тарқатмасликларини сўраб, аҳоли ўртасида ёлғон ахборот тарқатганлик учун жавобгарлик мавжудлигини эслатди.