“Қўлбола усулда ясалиб, ўзбошимчалик билан ўрнатилган”. Фарғонада 17 ёшли қиз йиқилган аттракцион ҳақида маълумот берилди

Фарғона вилояти Риштон туманида жойлашган марказий истироҳат боғидаги аттракциондан 17 ёшли қиз тушиб кетгани тўғрисида хабар берилганди. Тоғ-кон, геология ва саноат хавфсизлигини назорат қилиш инспекцияси ушбу ҳолатга муносабат билдирди.

Қайд этилишича, Риштон тумани “Ар-Рошидоний” маданият ва истироҳат боғида жойлашган, тадбиркор И.Т га қарашли “Қароқчилар кемаси” аттракционига чиққан 2005 йилда туғилган фуқаро Н.О. аттракционнинг маҳкамланган ҳимоя занжирини ўз қўли билан бўшатиб юбориши сабабли ерга қулаб тушган (камера тасвиридан олинган маълумотга кўра).

Қиз оғир аҳволда туман шифохонасининг реанимация бўлимига ётқизилган. Инспекция ходимлари томонидан ҳолат юзасидан ўтказилган ўрганиш натижасида “Қароқчилар кемаси” аттракциони қўлбола усулда ясалган бўлиб, 2022 йил июлда тадбиркор И.Т томонидан ўзбошимчалик билан ўрнатилгани аниқланган.

Мавжуд талабларга кўра, аттракцион махсус ихтисослаштирилган ташкилот томонидан ўрнатилиши лозим. Шунингдек, аттракционнинг техник паспорти мавжуд эмас, статик ва динамик синовлардан ўтказилмаган, кунлик техник назорат, аттракцион электр жиҳозларини ерга заминлаш ва изоляцияси қаршилигини ўлчаш, ишга тушириш ва созлаш ишлари бажарилмаган. Аттракционга 2022 йил август ойида мавсум учун махсус лаборатория томонидан металл конструкциясининг мустаҳкамлиги тўғрисида ижобий хулоса берилган бўлсада, шу кунгача аттракциондан тегишли рухсатнома олинмасдан фойдаланилган.

Ҳозирги вақтда фуқаро Н.О.нинг аҳволи қониқарли экани маълум қилинган. Ушбу ҳолат бўйича ҳуқуқ-тартибот органлари текширув ўтказмоқда.

Аввалроқ Бухоро шаҳрида жойлашган истироҳат боғида эр-хотин ва уларнинг фарзанди аттракциондан йиқилгани тўғрисида хабар берилганди. “Контехназорат”нинг маълум қилишича, ушбу аттракциондан фойдаланиш тақиқланган бўлган.