Турк драмалари дунё бўйлаб миллионлаб томошабинлар қалбидан жой олди. Айниқса, машҳур “Қўрғон сирлари”, “Қалбим эшигини қоқ”, “Муҳташам юз йил” ҳар бир хонадонга кириб борди. Бироқ турк телелойиҳалари денгизида ҳали ҳам кўплаб марваридлар мавжуд.
“Мени яшир”
Ноз ва Мете бой оила меросхўрлари бўлиб, хоҳлаган нарсаларига эришишга ўрганиб қолган. Жуфтлик ота-оналари қувончи учун тез орада ҳашаматли тўй қилишмоқчи. Уларнинг турмуш қуришини болаликдан орзу қилишган. Фақат Мете чет элдан қайтишини кутиш қолган, холос. Бироқ уларнинг бахтли эртаклари Мете Инжилани учратиши биланоқ барбод бўлади. Йигит ёқимтой қизга кўзи тушиши билан ошиқ бўлиб қолади, бу қиз қайлиғининг яқин дугонаси ва ёрдамчиси эканлигини билмайди.
Воқеа фақат севги учбурчаги билан чекланиб қолмайди. Қаҳрамонларни олдинда жиддий муаммолар ва саргузаштлар кутмоқда. Бош ролларда: Ураз Кайгилароғлу, Асуде Келебек ва Жемре Байсел.
“Меҳрибонлик”
Бир қарашда Неслиханнинг ҳаётига фақат ҳавас қилиш мумкин. У шахсий компаниясини бошқаради, ёнида севимли болалари ва эри бор. Аммо бир куни қаҳрамон аччиқ ҳақиқатни билиб қолади. Бир неча йиллардан бери эри Мурат ва энг яқин дугонаси унга хиёнат қилаётган экан. Ғазабланган аёл меҳрибонлигидан фойдаланган хиёнаткорлардан ўч олишга қарор қилади. Неслихан ролини гўзаллик мусобақаларининг иштирокчиси ва “Буюк Салжуқлар” драмаси юлдузи Хатиче Шендил ижро этган.
“Ҳукмдор Усмон”
Турк кино ижодкорлари, айниқса, тарихий лойиҳаларни аъло даражада яратишда муваффақиятга эришган. Шу сабабли “Ҳукмдор Усмон” сериалини кўриш қатъий тавсия этилади. Фильмда тарихий декорациялар, йирик жанг саҳналари ва, албатта, интригалар мавжуд. Усмон образида — Бурак Ўзчивит.
Лойиҳа “Эртуғрул”да бошланган ҳикояни давом эттиради. Томошабинлар улкан Усмонли империяси қандай пайдо бўлганини кўрадилар. Айтганча, суратга олиш жамоаси янги қисмлар устида ишлашда давом этмоқда. Янги мавсум келгуси кузда чиқади.
“Сапфир”
Яман Фераянинг қўлини сўрамоқчи, у буни болаликдан орзу қилган. Аммо ошиқларнинг режалари бирданига ўзгариб кетади. Қувонч келтириши керак бўлган кечада даҳшатли фожиа содир бўлади. Вазият шунгача етиб борадики, Яман охир-оқибат севгилисининг ўгай синглиси билан турмуш қуришга мажбур бўлади. Ферая йигитнинг хиёнатидан эзилади. Тез орада тақдир уни келишган ва бой йигит Атеш билан учраштиради. Аммо қиз Атеш Яманнинг акаси эканлигини билмайди.
Сериал томошабинларни фақат сюжетнинг мураккаблиги билан эмас, балки мафтункор локациялар билан ҳам хурсанд қилади. Лойиҳа Туркиянинг энг гўзал ҳудуди — Каппадокияда суратга олинган.
“Ёввойи”
Яман Али бой оилада туғилган. Лекин болакай тўрт ёшлигида ўғирлаб кетилади ва Истанбул кўчаларида уйсизлар орасида ҳаёт кечиришга мажбур бўлади. Барча қийинчиликларга қарамай, Яман оқкўнгил йигит бўлиб улғаяди. Бир кун тақдир уни бой қиз Руя билан учраштиради. Бу кутилмаган учрашув қаҳрамонни аввалги уйига қайтаради...
“Ёввойи” юқори рейтингларга ва дунё жамоатчилигининг эътирофларига сазовор бўлган лойиҳа. Кўплар фильмни қизиқарли сюжети учун мақташади. Шунингдек, актёрлар таркибида “Эртуғрул” юлдузи Халит Ўзгур Сарı ва “Золим Истанбул”даги Симай Барлас бор. Ижодкорлар янги мавсумда Нур Феттаҳоғлу пайдо бўлишини ваъда қилмоқда — у “Муҳташам юз йил” сериалида Моҳидаврон султон роли билан томошабинларга таниш.
Изоҳ (0)