АҚШ Давлат департаменти матбуот котиби мамлакат Афғонистон халқини қўллаб-қувватлашга содиқ эканини маълум қилди.
4 март куни бўлиб ўтган матбуот анжуманида Метью Миллер Афғонистонга ёрдам учун маблағ етишмаслиги ҳақидаги саволга жавоб бериб, АҚШ Афғонистон иқтисодиётининг асосий муаммоларини ҳал қилишга интилаётганини қўшимча қилди.
“Биз мамлакатни қўллаб-қувватлашда давом этиб, Афғонистондаги гуманитар инқирозда кўрилаётган кўплаб муаммоларни камайтиришга ҳисса қўшишга ҳаракат қиламиз”, — деди Метью Миллер.
Миллернинг қўшимча қилишича, Америка ҳозир ҳам Афғонистонга энг йирик гуманитар ёрдам етказиб берувчи ҳисобланади.
Унинг сўзларига кўра, 2021 йил август ойидан бери Америка Афғонистон халқига икки миллиард доллардан ортиқ ёрдам берган.
Айни пайтда Афғонистондаги ёрдам дастурлари маблағ етишмаслигига дуч келмоқда. Бирлашган Миллатлар Ташкилотининг Гуманитар масалаларни мувофиқлаштириш бошқармаси OCHA маълум қилишича, 2024 йилда Афғонистонга ёрдам кўрсатиш учун зарур бўлган 3,06 миллиард доллардан ҳозиргача фақат 87 миллион доллар ажратилган.
OCHA маълумотларига кўра, 2024 йилда Афғонистонда 23,7 миллион киши гуманитар ёрдамга муҳтож.
Ушбу дастурга кўра, Афғонистонда тўрт миллион бола ва аёл тўйиб овқатланмайди ва ёрдам камайиши билан вазият янада ёмонлашади.
Изоҳ (0)