Тошкент шаҳар Олмазор туманида фуқаро ўз уйида Қизил китобга киритилган қушларни сақлаб келаётгани аниқланди. Бу ҳақда Экология вазирлиги ахборот хизмати хабар берди.
Маълум қилинишича, Экология бошқармаси Олмазор тумани бўлими инспекторлари томонидан навбатдаги рейд тадбири ўтказилди. Рейд давомида тумандаги “Гуручариқ” маҳалласи хонадонларининг бирида 1 жуфт, Ўзбекистон Қизил китобига киритилган Туркистон оқ лайлаклари сақланаётгани аниқланди.
Ҳолат юзасидан ўрганиш ишлари олиб борилди. Натижада фуқаро Б. А. қушларни ўтган йилнинг ёз ойида Сирдарё вилоятида қанотлари синган ҳолда топиб олгани ҳамда уларга ёрдам кўрсатиб, парвариш қилиб келаётгани аниқланди.
Фуқарога ёввойи, шунингдек, Ўзбекистон Қизил китобига киритилган жонзотларни уйда ноқонуний сақлаш мумкин эмаслиги тушунтирилди. Оқ лайлаклар эса табиат бағрига қўйиб юборилди.
Изоҳ (0)