Европа Иттифоқи давлатларига келиб тушган бошпана соъраш аризалари сони рекорд даражага етди

Европа Иттифоқи, Норвегия ва Швейцарияга бошпана сўраб мурожаат қилганлар сони 2016 йилдан бери биринчи марта яна 1 миллиондан ошди. Мурожаатчиларнинг аксарияти Сурия ва Афғонистондан. Бу ҳақда EUАА хабар берди.

2023 йилда Европа Иттифоқи давлатларига, шунингдек, Швейцария ва Норвегияга бошпана сўраб 1,14 миллионта мурожаатлар келиб тушган. Мазкур маълумотлар 28 февраль куни Европа Иттифоқининг бошпана масалалари бўйича агентлиги (EUАА) томонидан эълон қилинган.

Ўтган бир неча йилдагидек, Сурия фуқаролари энг кўп – 181 мингта сўров юборган, бу ўтган йилга нисбатан 38 фоизга кўп. Афғонистонлик қочқинлар 114 мингта ариза билан мурожаат қилган. 2023 йил охирида ҳимоя сўраб мурожаат қилган фаластинликлар сони ҳам ошган.

Ўтган йилга нисбатан бошпана сўраб мурожаат қилганларнинг умумий сони 18 фоизга ошган. Мутлақ рақамларда энг кўп аризалар Германия (334 000), Франция (167 000), Испания (162 000), Италия (136 000) га берилган бўлиб, аризаларнинг учдан икки улуши тўртта давлатнинг ўзига тўғри келган.

Маълумотларга кўра, Европа Иттифоқида вақтинчалик ҳимояланган 4,4 миллион нафар украиналик қочқинлар ушбу статистикага киритилмаган.