Ўрта Ер денгизи орқали Шимолий Африкадан Европага ноқонуний миграция сўнгги олти ой ичида камида 289 боланинг ҳаётига зомин бўлди, деб хабар бермоқда UNICEF.
Ташкилотнинг таъкидлашича, ҳалок бўлган болаларнинг ҳақиқий сони анча кўп бўлиши мумкин, чунки чўкиб кетган кемалар жуда кўп, уларда ҳеч ким омон қолмаган.
“Денгизда ҳаётни сақлаб қолиш бўйича саъй-ҳаракатларни кучайтириш билан бирга, болаларнинг бошпана олиши учун хавфсиз ва қонуний йўлларни яратиш борасида кўпроқ иш қилиш керак”, — дейилади UNICEF ижрочи директори Кетрин Расселнинг сўзларидан иқтибос келтирилган хабарда.
Бу муаммони ҳал қилиш учун у ота-оналарни ўз фарзандларининг ҳаётини хавф остига қўядиган сабабларни бартараф этишга чақирди.
UNICEF ҳисоб-китобларига кўра, 2023 йил январь ойидан буён Африкадан Италияга 11 600 нафар бола келган, бу ўтган йилнинг шу даврига нисбатан икки баравар кўп.
14 июнь куни Греция қирғоқларида шимолий африкалик муҳожирлар ўтирган балиқчи қайиқ ағдарилиб кетганди. 100 дан ортиқ одам қутқариб олинди. Қайиқ бортида 700 нафаргача одам бўлгани тахмин қилинмоқда. Қолганлар тирик топилмаган.
Июль бошида эса Канар ороллари яқинида кема чўкиб кетиши оқибатида бортдаги 51 муҳожир ҳалок бўлди. Испания Ички ишлар вазирлиги маълумотларига кўра, 2023 йилнинг январидан майигача Канар оролларига 4,4 мингдан ортиқ ноқонуний муҳожирлар кириб келган.
Изоҳ (0)