Тошкентда мебел ишлаб чиқариш цехида ёнғин чиқди. Уни ўчиришга 20 та экипаж жалб этилди (видео)

Фавқулодда вазиятлар вазирлиги Тошкент шаҳар Чилонзор тумани, “Бектўпи” МФЙ Дийдор кўчасида содир бўлган ёнғин тўғрисида бирламчи маълумот берди.

Қайд этилишича, 27 февраль куни соат 00:13 да “Бектўпи” МФЙ Дийдор кўчасида жойлашган, ангар сифатида фойдаланиб келаётган мебел ишлаб чиқариш цехида ёнғин содир бўлгани тўғрисида Тошкент шаҳар Фавқулодда вазиятлар бошқармасига хабар келиб тушган.

“Ёнғинга соат 00:17 да ёнғин қутқарув экипажлари етиб бориб, ёнғин 01:29 да ўраб олинган ва соат 05:52 да тўлиқ бартараф этилди”, — дейилади хабарда.

Ёнғинни бартараф этишга 18 та асосий, 2 та махсус ёнғин-қутқарув экипажи ва бешта сув ташувчи ёрдамчи автомобиллар жалб этилган. Ёнғин-қутқарувчиларнинг саъй-ҳаракатлари натижасида 5 нафар ишчи ёнғиндан қутқарилиб, тез тиббий ёрдам ходимларига топширилган.

Ёнғин оқибатида ҳалок бўлганлар йўқ. ҳозирда ёнғин сабаби ва моддий зарар миқдори аниқланмоқда.

Мазкур ҳолат юзасидан дастлабки терговолди суриштирув ишлари олиб борилмоқда. Воқеа жойига ФВВ раҳбарияти, Тошкент шаҳар ФВБ бошлиғи ва ўринбосарлари, ИИБ, прокуратура, “Ҳудудгазтаъминот” ва ССБ, туман ФВБ раҳбар ва ходимлари чиққан

Эслатиб ўтамиз, Тошкентда реконструкция бўлаётган “Пойтахт” бизнес марказида 9 февраль куни ёнғин юз берганди.