Ўзбекистонда 2023 йилда рўй берган ЙТҲларнинг учдан бир қисми Фарғона водийси вилоятларига тўғри келди

Ўзбекистонда 2023 йилда рўй берган йўл-транспорт ҳодисаларининг қарийб учдан бир қисми Фарғона водийси вилоятларига тўғри келди. Бу ҳақда Наманган муҳандислик-қурилиш институтида бўлиб ўтган “Фарғона водийсида хавфсиз ҳаракатланишни таъминлаш: муаммо ва ечимлар” мавзусидаги илмий-амалий анжуманда Йўл ҳаракати хавфсизлиги муаммоларини ўрганиш маркази раҳбари Машрабжон Раззоқов маълум қилди, дея хабар беради “Дарё” мухбири Азизбек Абдувалиев.

Айтилишича, 2023 йили Фарғонада 1310 та, Наманганда 981 та, Андижонда эса 766 та ЙТҲ қайд этилган. Ушбу ҳодисалар оқибатида водий вилоятларида 575 киши ҳалок бўлган, 2837 киши жароҳатланган.

“Водий йўлларидаги ҳар иккинчи аварияга йўл-транспорт инфратузилмаси мақбуллаштирилмаганлиги сабаб бўлмоқда. ЙТҲларнинг салмоқли қисми пиёдалар иштирокида ва ҳайдовчилар тажрибасизлиги туфайли рўй бераётгани ачинарли. Андижонда эса ҳар иккинчи ҳодиса белгиланган тезликка риоя этмаслик оқибатида содир этилган”, — дейди Машрабжон Раззоқов.

Наманган вилоятида 103 рақамига амалга оширилган чақирувлар таҳлил қилинганда уларнинг 3566 таси йўл-транспорт ҳодисаларига ҳамда ҳар учинчиси Қамчиқ довони ҳиссасига тўғри келган.

Бироқ ушбу ҳудудда оғир тан жароҳати олганларга малакали шошилинч тиббий ёрдам кўрсатиш имконияти чекланганлиги боис жабрланганларни Поп тумани ёки Ангрен шаҳар тиббиёт бирлашмасига олиб боришга мажбур бўлинмоқда.

Шу боис Қамчиқ довонидаги “Резаксой” тез ёрдам бўлимида реанимацион постни тўлақонли ишга тушириш, Наманган—Тошкент автомагистрал йўлида 3 та тез тиббий ёрдам постини ташкил этиш чораларини кўриш таклифлари билдирилди.

“Мазкур анжуман олий таълим муассасаси билан ҳамкорликда ўтказилгани бежиз эмас. Чунки конференция давомида йўл ҳаракати хавфсизлиги ва транспорт инфратузилмасига оид муаммоли масалаларни муҳокамага қўйишдан олдин профессор-ўқитувчилар томонидан батафсил ўрганиш механизмини жорий этиш, талабалар ўртасида йўл ҳаракати интизоми ва маданияти бўйича тарғибот тадбирларни олиб бориш масалалари муҳокама қилинди.

Қолаверса, бугунги кунда институтимиз олимлари томонидан Наманган шаҳрида жамоат транспорти тизими ва инфратузилмасини такомиллаштириш бош режасини ишлаб чиқиш лойиҳаси амалга оширилмоқда”, — дейди тадбирга мезбонлик қилган Наманган муҳандислик-қурилиш институти ректори Шарифжон Эргашев.

Конференцияда водий вилоятларида йўловчи ташишда жамоат транспорти улушини камида 3 баробарга ошириш, транспорт воситаларининг ҳаракатланиш интервалини қисқартириш, бу борада хусусий сектор вакиллари билан тиғиз ҳамкорликни йўлга қўйиш масалалари ҳам кўриб чиқилди.

Маълумот учун, бугунги кунда йўловчи ташиш умумий ҳажмида жамоат транспортининг улуши Андижонда 25 фоиз, Фарғона ва Наманган вилоятларида эса атиги 10 фоизни ташкил этмоқда.