“Док-1 Макс” ишида айбдор кўрилган 23 нафар судланувчига ҳукм ўқилди. Уларнинг 6 нафаридан 72 нафар жабрланувчиларнинг қонуний вакилларига 1 миллиард сўмдан, қолганларга 500 миллион ва 200 миллион сўмдан зарар пули ундирилиши белгиланганди. Бироқ суд сироп ишлаб чиқарувчиси бўлган Ҳиндистон компаниясидан товон пули ундириш масаласини очиқ қолдирди. Судья Мусо Юсупов бу ҳолатга изоҳ берди, дея хабар берди “Дарё” журналисти.
Бугун “Док-1 Макс” суди якунлангач, мазкур жиноят ишини кўриб чиққан судлов ҳайъати раиси — Мусо Юсупов иштирокида журналистлар учун матбуот анжумани ташкил этилган.
Матбуот анжуманда сўз олган “Дарё” журналисти сироп ишини кўриб чиққан суд ҳиндистонлик судланувчилардан жабрланувчиларга етказилган зарарни ундириш масаласига умуман эътибор қаратмагани сабабини сўради.
Жиноят ишини кўриб чиқаётган пайтимизда ҳам бу масала кўтарилган эди. Яъни Индонезияда мазкур сиропдан 200 дан ортиқ фуқаро ўлгани ва бунинг ортидан 30 миллион доллар товон ундирилгани ҳақидаги масала кўтарилди. Биз бу судда ҳар бир шахснинг айбдор ёки айбсизлик масаласини кўриб чиқдик. Судланувчиларга нисбатан ваколат доирамизда қарор қабул қилдик. Бу нарса эса халқаро суд тартибида ҳал қилинадиган масала, — дейди судья Мусо Юсупов.
Судьянинг қўшимча қилишича, “Док-1 Макс” ишлаб чиқарувчиси бўлган Ҳиндистон компаниясидан товон пули ундириш учун бунга ваколатли бўлган орган томонидан халқаро судга мурожаат қилиниши лозим.
Тегишли орган бу нарсани олиб, халқаро тартибда мурожаат қилади. Чунки бу компания Ҳиндистондаги ишлаб чиқарувчи корхона. Бизда қабул қилинган қарор уларда ижро қилинмайди. Халқаро тартибда кўрилса, ижро қилинади. Адашмасам, бу бўйича ҳаракатлар бор. Боиси бу сиропдан фақат бизда эмас, бошқа мамлакатларда ҳам жабрланувчилар бўлган, — дейди судья.
Изоҳ (0)