Байден: “АҚШ санкциялари Россия ҳарбий-саноат комплексига ёрдам бераётган 100 га яқин компанияга таъсир қилади”

 Жо Байден АҚШнинг Россияга қарши эълон қилган санкциялари мамлакат мудофаа-саноат комплексига алоқадор 100 га яқин компанияга таъсир қилишини айтди.

Оқ уй веб-сайтида эълон қилинган баёнотда у АҚШнинг янги санкциялар пакети 500 дан ортиқ объектга қаратилгани ҳақидаги маълумотни ҳам тасдиқлади.

Жо Байденнинг таъкидлашича, санкциялар “Россия уруш машинасини парда ортидан қўллаб-қувватловчи” юзлаб корхоналарга тегишли. Улар энергетика соҳасига ҳам таъсир қилади, деди у.

Жо Байденнинг сўзларига кўра, гап россиялик мухолифатчи Алексей Навальнийнинг ўлими билан боғлиқ санкциялар ҳақида бормоқда.

“Ушбу санкциялар Навальнийнинг қамоққа олинишига алоқадор шахслар, шунингдек, Россия молия сектори, мудофаа саноат базаси, харид қилиш тармоқлари ва кўплаб қитъалардаги санкциялардан бўйин товлаган шахсларга қаратилган”, — деди Америка президенти.

Аввалроқ АҚШ молия вазири ўринбосари Уолли Адеемо чекловлар “500 дан ортиқ объектга” таъсир қилишини айтганди.

Европа Иттифоқи ва АҚШ 24 февралда, Украинада ҳарбий ҳаракатлар бошланганининг икки йиллиги муносабати билан янги чекловлар жорий этиши тахмин қилинган эди. Бугун, 23 февраль куни ЕИ Россияга қарши 13-санкция пакетини эълон қилди. Унинг таркибига 106 нафар жисмоний ва 88 та юридик шахс, шунингдек, Россия ҳарбий-саноат комплексини қўллаб-қувватловчи 27 та ташкилот кирган.