Россия Адлия вазирлиги “Новая газета” бош муҳаррири, 2021 йилги тинчлик бўйича Нобел мукофоти совриндори Дмитрий Муратовни “хорижий агентлар” реестрига киритди.
Вазирлик маълумотларига кўра, Муратов хорижий агентларнинг материалларини яратиш ва тарқатишда иштирок этган, шунингдек, хорижий платформаларда Россиянинг ташқи ва ички сиёсатига салбий муносабатни шакллантиришга қаратилган фикрларни тарқатган.
2021 йил 8-октябрь куни тинчлик бўйича Нобел мукофотига Россиянинг “Новая газета” нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлганди. Нобел мукофоти уларга “демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари” учун берилган.
2021 йил декабрида Дмитрий Муратов ваъда қилганидек, ўзига берилган тинчлик бўйича Нобел мукофоти маблағларини хайрияга топширади. Мукофотнинг умумий суммаси қарийб 40,2 миллион рублни (546 минг доллар) ташкил этган. Пул ташкилотлар ўртасида тақсимланган бўлиб, улар “шериклар” – “Новая газета”ни хайрия билан қўллаб-қувватлаган ўқувчилар орасидан овоз бериш йўли билан танланган.
Дмитрий Муратов — “Новая газета” асосчиларидан бири бўлиб, 1995 йилдан буён нашрга бош муҳаррирлик қилиб келади. Газета инсон ҳуқуқлари бузилиши мавзусидаги суриштирувлар ва мақолалари билан таниқли.
2022 йил 28 март куни “Новая газета” ўз фаолиятини вақтинчалик тўхтатди. Бу “Роскомнадзор” нашрга мақолада нотижорат ташкилот-хорижий агент маркировкаси йўқлиги туфайли иккинчи марта огоҳлантириш юборганидан кейин юз берди. Таҳририятнинг баъзи ходимлари чет элга кетиб, “Новая газета. Европа” нашрини очди. 29 апрель куни “Роскомнадзор” унинг сайтини Россия ҳудудида блоклаб қўйди.
Изоҳ (0)