Улуғбек Хамдамов Бухоро вилояти прокурори лавозимига тайинланди. Бу ҳақда ЎзА хабар берди.
Маълум қилинишича, бош прокурорнинг буйруғига асосан адлия маслаҳатчиси Улуғбек Аслонович Хамдамов Бухоро вилояти прокурори лавозимига тайинланди. Улуғбек Хамдамов тайинловга қадар Фарғона вилояти Қўқон шаҳар прокурори лавозимида ишлаган.
“Кун.уз”га кўра, бу ўзгариш катта эҳтимол билан ўтган ҳафтада вилоятнинг Когон тумани прокурори Баҳодир Ғуломов 90 минг АҚШ доллари олаётганда қўлга тушгани билан боғлиқ.
Шавкат Мирзиёев 16 февраль куни Андижон вилоятида ўтказилган йиғилишда мазкур иш тафсилотларига тўхталиб, у жами 200 минг доллар сўрагани ҳақида айтганди ва бош прокурорга ушбу ҳолат юзасидан топшириқ берганди.
Маълумот учун, пора олди-бердиси 2024 йилнинг 13 февраль куни соат 23:00 ларда Бухоро шаҳар шошилинч тез тиббий ёрдам марказий биноси ёнида содир бўлган ва прокурор воқеа жойида далиллар билан ушланган.
Когон тумани прокурори 90 минг доллар порани “Когон ёғ экстракция заводи” АЖ таъсисчиси М.I.дан олган. Эвазига вилоят прокуратураси иш юритувида бўлган жамият мансабдор шахсларига нисбатан жиноят иши бўйича қидирувда бўлган жамият таъсисчиси М.I.га нисбатан қўлланган қамоқ эҳтиёт чорасини ўзгартириб, унга енгиллик беришни ваъда қилган.
Прокуратура тизимида 2012 йилдан бери ишлаб келаётган Б.Ғ. 2022 йилнинг 11 апрель кунидан буён Когон тумани прокурори сифатида фаолият юрита бошлаганди. Айни пайтда воқеа юзасидан Бухоро вилоят прокуратураси томонидан терговга қадар текширув ҳаракатлари ўтказилмоқда.
Изоҳ (0)