Ulug‘bek Xamdamov Buxoro viloyati prokurori lavozimiga tayinlandi. Bu haqda O‘zA xabar berdi.
Ma’lum qilinishicha, bosh prokurorning buyrug‘iga asosan adliya maslahatchisi Ulug‘bek Aslonovich Xamdamov Buxoro viloyati prokurori lavozimiga tayinlandi. Ulug‘bek Xamdamov tayinlovga qadar Farg‘ona viloyati Qo‘qon shahar prokurori lavozimida ishlagan.
“Kun.uz”ga ko‘ra, bu o‘zgarish katta ehtimol bilan o‘tgan haftada viloyatning Kogon tumani prokurori Bahodir G‘ulomov 90 ming AQSH dollari olayotganda qo‘lga tushgani bilan bog‘liq.
Shavkat Mirziyoyev 16-fevral kuni Andijon viloyatida o‘tkazilgan yig‘ilishda mazkur ish tafsilotlariga to‘xtalib, u jami 200 ming dollar so‘ragani haqida aytgandi va bosh prokurorga ushbu holat yuzasidan topshiriq bergandi.
Maʼlumot uchun, pora oldi-berdisi 2024-yilning 13-fevral kuni soat 23:00 larda Buxoro shahar shoshilinch tez tibbiy yordam markaziy binosi yonida sodir bo‘lgan va prokuror voqea joyida dalillar bilan ushlangan.
Kogon tumani prokurori 90 ming dollar porani “Kogon yog‘ ekstraksiya zavodi” AJ taʼsischisi M.I.dan olgan. Evaziga viloyat prokuraturasi ish yurituvida bo‘lgan jamiyat mansabdor shaxslariga nisbatan jinoyat ishi bo‘yicha qidiruvda bo‘lgan jamiyat taʼsischisi M.I.ga nisbatan qo‘llangan qamoq ehtiyot chorasini o‘zgartirib, unga yengillik berishni vaʼda qilgan.
Prokuratura tizimida 2012-yildan beri ishlab kelayotgan B.G‘. 2022-yilning 11-aprel kunidan buyon Kogon tumani prokurori sifatida faoliyat yurita boshlagandi. Ayni paytda voqea yuzasidan Buxoro viloyat prokuraturasi tomonidan tergovga qadar tekshiruv harakatlari o‘tkazilmoqda.
Izoh (0)