Олий Мажлис Қонунчилик палатаси спикери ўринбосари Одилжон Тожиев пора билан қўлга тушган судьялар ва прокурорлар томонидан кўрилган ишларни қайта кўриб чиқишни таклиф қилди.
Одилжон Тожиев Мингбулоқ тумани суди раиси 2 минг доллар пора олган пайтда ушлангани, Когон тумани прокурори 90 минг доллар пора олаётганда қўлга тушгани ҳақидаги хабарлардан сўнг бу борада ўз муносабатини билдирди.
Афсуски, бундай ишлар одатий ҳолдек ўтиб кетмоқда. Бироқ қонунни амалда қўллаш орқали қонунийликни таъминлаш асосий бурчи бўлган бу каби шахсларнинг ўзлари қонунни бузаётгани одамларда қонунларга, пировардида эса давлатга бўлган ишончни йўқотади, — деди у.
Олий Мажлис Қонунчилик палатаси спикери ўринбосарининг таъкидлашича, бундай шахсларнинг жиноятига баҳо беришда уларнинг ўтган фаолияти давомида фуқароларга нисбатан тасдиқлаган айблов хулосалари ва қабул қилган қарорларига ҳам баҳо берилиши керак.
Чунки бу каби нолойиқ шахсларнинг ҳаракатлари оқибатида қанчадан-қанча фуқаролар ноҳақ айбланиб, ноҳақ судланиб кетган бўлиши мумкин, — дейди Одилжон Тожиев.
Унинг фикрича, қонунчиликни мана шу йўналишда такомиллаштириш зарур. Бундай жиноятчи шахслар кўриб чиққан барча материаллар кўтарилиб, қайта кўриб чиқилиши шарт. Шунда адолат тикланади.
Изоҳ (0)