Андижон вилоятида давлат раҳбари раислигида бўлиб ўтаётган йиғилишда президент пора билан қўлга тушган Когон тумани прокурори ҳақида тўхталиб ўтди.
Давлат раҳбари Когон тумани прокурори 100 минг доллар билан қўлга тушганини айтди.
“Мен нима учун буни элга айтяпман? Буям бош прокурор ҳаракати билан амалга ошяпти. Бу ўзи курашчи бўлиб, ходими ўғри бўлса, дардимизни кимга айтайлик? 3 кун олдин менга айтди, мен айтдим, “индаманглар, эртага суддан қайтмаслиги керак бу нарса”, дедим. Секин-секин 200 минг долларни гаплашган. 91 мингни олиб келяпти, “йўқ, наригисини ҳам олиб келасан”, деяпти. “Уни ҳам индаманглар”, дедим. Учинчи куни 91 мингни олиб келди-да, 101 мингни олиб келинглар, деяпти. Энди яна майда-чуйда бўлмасин-ку, 10 мингни ўртадаги воситачилар олиб қўйяпти. “Йўқ, 10 мингни ҳам менга олиб кел”, деди ноинсоф прокурор.
Бош прокуроримиз шу ерда ўтирибдилар, Бухорога бориб ишдан олади”, — деди давлат раҳбари.
Маълумот учун, пора олди-бердиси 2024 йилнинг 13 февраль куни соат 23:00 ларда Бухоро шаҳар шошилинч тез тиббий ёрдам марказий биноси ёнида содир бўлган ва прокурор воқеа жойида далиллар билан ушланган.
Когон тумани прокурори 90 минг доллар порани “Когон ёғ экстракция заводи” АЖ таъсисчиси М.И.дан олган. Эвазига вилоят прокуратураси иш юритувида бўлган жамият мансабдор шахсларига нисбатан жиноят иши бўйича қидирувда бўлган жамият таъсисчиси М.И.га нисбатан қўлланган қамоқ эҳтиёт чорасини ўзгартириб, унга енгиллик беришни ваъда қилган.
Прокуратура тизимида 2012 йилдан бери ишлаб келаётган Б.Ғ. 2022 йилнинг 11 апрель кунидан буён Когон тумани прокурори сифатида фаолият юрита бошлаганди. Айни пайтда воқеа юзасидан Бухоро вилоят прокуратураси томонидан терговга қадар текширув ҳаракатлари ўтказилмоқда.
Изоҳ (0)