Швейцария Федерал прокуратураси Россияга қарши санкцияларнинг бузилиш ҳолатлари бўйича терговни бошлади. Прокуратура тергов тафсилотларини тақдим этишдан бош тортди. Бу ҳақда “Коммерсант” хабар берди.
Швейцария ҳукумати Россияга қарши жорий этилган санкцияларни четлаб ўтиш мумкин бўлган 230 та ҳолатни аниқлаганини маълум қилди. 46 та ҳолат бўйича маъмурий тергов иши қўзғатилди, иккита иш федерал прокуратураларга топширилди. SECО (Швейцариянинг иқтисодий масалалар бўйича давлат котибияти) бу маълумотларни тасдиқлади. Аниқланишича, айрим ҳолатларда қоидалар қасддан эмас, балки шунчаки эътиборсизлик сабаб бузилган.
SECО 2022 йил 25 ноябрь ҳолатига кўра, мамлакатда 7,5 миллиард Швейцария франки (тахминан 8,5 миллиард доллар) қийматидаги молиявий активлар ва 15 та кўчмас мулк объектлари музлатиб қўйилганини маълум қилди. Россия Марказий банкининг Швейцариядаги захиралари ва активларининг умумий миқдори 7,4 миллиард Швейцария франки (7,9 миллиард доллардан ортиқ) деб баҳоланмоқда.
Айни пайтда Европа Иттифоқи давлатлари Россияга қарши 13-санкция пакетини ишлаб чиқмоқда. Bloomberg’га кўра, у савдо чекловларини кучайтириш, қора рўйхатларни кенгайтириш ва Европадаги учинчи давлатлар ва компаниялар орқали санкциялар бузилиши устидан назоратни ўз ичига олади. Financial Times’нинг хабар беришича, янги чекловлар Россия—Украина уруши бошланганининг 2 йиллиги муносабати билан 2024 йил 24 февралда қабул қилиниши кутилмоқда.
Изоҳ (0)