АҚШ разведкаси Россия коинотда ядро қуроли жойлаштирмоқчилигини маълум қилди. АҚШ президенти Жо Байден ҳолат юзасидан Россия билан музокара бошлашни буюрди.
Хабарга кўра, гап ядро қуролининг ердаги нишонларга қарши эмас, балки сунъий йўлдошларга қарши қўлланилиши мумкинлиги ҳақида кетмоқда. АҚШ Вакиллар палатасининг разведка қўмитаси раиси Майк Тёрнер ўз ҳамкасбларини “миллий хавфсизликка жиддий таҳдид” ҳақида огоҳлантирган. У эҳтимолий таҳдид тафсилотларини ошкор қилмаган ва махфий маълумотларни очиқлаш ҳуқуқига эга эмаслигини айтган.
Шундан кейин оммавий ахборот воситалари Россия ўзининг ядровий салоҳиятини ривожлантираётгани ва коинотда ядро қуролини жойлаштиришни режалаштираётганини ёза бошлаган. Вазият жиддий, бироқ ҳозирча таҳдид йўқ, деб ёзади Financial Times.
Тёрнернинг баёнотидан сўнг АҚШнинг миллий хавфсизлик бўйича маслаҳатчиси Жейк Салливан бу борада брифинг ўтказиш ниятида эканини билдирган. Журналистлар ундан америкаликлар Тёрнернинг огоҳлантиришидан хавотирланишлари керакми, деб сўраган.
“Ишончим комилки, президент Байден ўз қарорлари билан Америка халқини хавфсиз сақлайди. Биз АҚШ ва америкаликларнинг хавфсизлигини ҳимоя қила оламиз”, — деб жавоб берган у.
Ўз навбатида, АҚШ президенти Жо Байден Россия билан орбитада сунъий йўлдошларни йўқ қила оладиган тизимни ишлаб чиқиш юзасидан тўғридан тўғри мулоқот ўтказишни буюрган.
“Улар ҳали ҳам бу имкониятни ривожлантирмоқда. Биз бунга доир маълумотларни таҳлил қилмоқдамиз”, — деган Кирби ва Байденнинг буйруғи тафсилотларини келтирмаган.
Изоҳ (0)