16 февраль куни Бирлашган Миллатлар Ташкилотининг Фаластинлик қочқинларга ёрдам кўрсатиш масалалари билан шуғулланувчи Яқин Шарқ агентлиги (UNRWA) ҳудуддаги соғлиқни сақлаш муассасаларининг 84 фоизи бузиб ташланганини расман маълум қилди. Бу ҳақда CNN нашри хабар бермоқда.
Яқин Шарқ агентлиги Ғазодаги асосий гуманитар ёрдам кўрсатувчи ташкилот ҳисобланиб, 2 миллионга яқин ғазоликларнинг моддий ва саломатлик билан боғлиқ таъминоти тўғридан тўғри унга боғлиқ. Агентлик ҳудудда 13 мингдан ортиқ ходимга эга. Улар асосан маҳаллий ғазоликлардан иборат.
Олдинроқ Исроил ҳукумати UNRWA’нинг 13 нафар аъзосини 7 октябрь ҳужумларида иштирок этганликда айблаган эди. Ташкилот ишига Исроилнинг тўғридан тўғри аралашуви ва таҳдид ҳудудга халқаро донорлик ёрдамини тўхтатиб қўйди.
БМТнинг ваколатли ташкилоти эксклав зонасида соғлиқни сақлаш тизими деярли тўла вайрон бўлганини билдирган. Ҳозирда на маҳаллий муассасалар ва на халқаро гуманитар ташкилотлар аҳолига ёрдам бера оляпти.
Шунингдек, баёнотда келтирилишича, Ғазодаги фуқаролик объектлари ҳамда маҳаллий инфраструктуранинг 70 фоиздан ортиғи яроқсиз ҳолга келтирилган. БМТ воситачилигида етказилиши мўлжалланган ёрдам карвонлари ҳаракатига эса маҳаллий исроилликлар қаттиқ қаршилик кўрсатаётгани айтилган.
Изоҳ (0)