Араб давлатлари лигаси етакчиси Ғазо аҳолисининг дислокация қилиниши узоқ муддатли янги кескинликни бошлаб бериши ҳақида маълум қилди.
Дубайда бўлиб ўтган Жаҳон ҳукуматлараро саммитида сўзга чиққан Аҳмад Абул Ғайт Исроилнинг Рафаҳга давом этаётган ҳужумининг “хавфли оқибатлари” ҳақида яна бир бор огоҳлантирди. “Муаммога аниқ ечим берилмас экан, у чегаралардан ошишда давом этади”, — деди Аҳмад Абул Ғайт.
“Исроил режимининг тинч аҳолига ҳужумлардан сўнг, охирги чора сифатида Рафаҳда бошпана топган юз минглаб фаластинликларни кўчириши қабул қилиб бўлмас ҳаракатдир. Бу минтақавий барқарорликка жиддий таҳдид солади”, — дея қўшимча қилган Аҳмад Абул Ғайт.
Араб лигаси етакчиси ,шунингдек, АҚШ ва Ғарб блоки Исроилдан ҳужумларини дарҳол тўхтатишни талаб қилиши кераклиги, акс ҳолда Яқин Шарқда зўравонлик авжига чиқиши мумкинлигини айтган. Мустақил Фаластин давлати ташкил топиши имкониятини муҳокама қилар экан, у бу сценарий Исроил “Фаластин ерларида қурилган ноқонуний аҳоли пунктларини бузиб ташлагандагина” амалга ошишини таъкидлади.
Лига етакчиси ,шунингдек, Фаластин қаршилик ҳаракатларини тор-мор этиш имконсиз эканлигини, унга қарши курашиш эмас, балки, бу ҳолатдан тўғри хулоса чиқариш керак эканлигини таъкидлаган. Яқин Шарқда Эрон ва унга иттифоқчи кучларнинг минтақавий хавфсизликка таъсири эса “Ғарб қўзғатган” омилдир, дея баҳолади у.
Олий вакил, ўз навбатида, Саудия Арабистони ўтган йилнинг март ойида Теҳрон билан муносабатларни нормаллаштириш бўйича келишувга эришганини, Кўрфаз араб давлатлари ҳамкорлик кенгаши ва Эрон муносабатлари “янги босқичга” олиб чиқилгани, бу тенденциялар келажакда минтақавий барқарорликка катта ижобий таъсир кўрсатишда асос бўлиши мумкинлигини таъкидлаган.
Изоҳ (0)