Ўзбекистонда болалар шамоллашига қарши қўлланилган “Док-1 Макс” сиропи энг камида 68 боланинг ўлимига сабабчи бўлгани, 16 нафар боланинг оғир, 2 нафар боланинг эса енгил тан жароҳати олишига олиб келгани маълум қилинганди. “Дарё” журналисти билан суҳбатлашган жабрланувчиларнинг айтишича, сиропдан жабрланганлар рўйхати 18 нафардан кўп бўлиши ҳам мумкин.
Муслима қизимиз, “Док-1 Макс” сиропидан тан жароҳати олиб, ногирон бўлиб қолган. Биз бу ҳақда 2023 йилнинг 17 август куни ДХХ тергов бошқармасида гапириб берганмиз. Жабрланувчи сифатида тегишли ҳужжатларни ҳам тақдим қилганмиз. Аммо бугунги кунга келиб, набирамиз жабрланувчилар рўйхатидан тушиб қолгани аниқланди. Суд бўлаётганини эшитиб, судга келганимизда биз рўйхатда йўқлигимиз учун чақирилмаганимизни айтишди. Аммо ДХХнинг вилоят бошқармаси бошлиғи Муслима қизимизнинг ҳолати бўйича бошланган иш тергов қилиниб, Жиноят ишлари бўйича Тошкент шаҳар судига юборилганини билдирган, — дейди Улуғбек Улкенов.
Мурожаатчининг айтишича, айни кунда 7 ёшга етган Муслимани даволатиш учун ойига 38 миллион сўм миқдорида маблағ сарфланмоқда.
Сироп сабаб ногирон бўлиб қолгани айтилаётган қизалоқнинг отаси Илҳом Азимов дорини ўзи сотиб олганини, қизи бу сиропни уч кун уч маҳалдан истеъмол қилганини айтмоқда.
Қизим етти ёшда. “Док-1 Макс” сиропини аптекадан ўзим олиб келгандим. Қизим бу сиропдан уч кун, уч маҳалдан ичганди. Шу доридан заҳарлангач, аввалига Жиззахда, кейин Тошкентдаги болалар марказида даволанди. Ҳозирги кунда ногирон бўлиб қолган. Юролмайди, гапира олмайди, фақат ётади, — дейди қизалоқнинг отаси.
-pneLF34S.jpg)
Илҳом Азимовнинг маълумот беришича, қизини шифокорлар кўрсатмасига асосан вақти-вақти билан Тошкентда даволатиб қайтади.
Терговда барчасини айтиб бергандик. Судга келсак, рўйхатда сизларнинг фамилиянгиз чиқмаяпти дейишди. Уч-тўрт кишининг исми рўйхатдан чиқмаётган экан, — дейди у.
Тергов эълон қилган қўшимча жиноят ишида ёзилишича, “Док-1 Макс” сиропидан яна 16 нафар бола оғир, 2 нафари эса енгил тан жароҳати олган.
Изоҳ (0)