Жаҳон соғлиқни сақлаш ташкилоти (ЖССТ) 2050 йилга бориб саратон касаллигига чалиниш 35 миллионга етиши, бу 2022 йилда қайд этилган 20 миллиондан 77 фоизга кўплигини маълум қилди. ЖССТнинг Саратон касалликлари бўйича халқаро агентлиги томонидан онкология соҳасидаги ишлар ҳолати тўғрисидаги ҳисобот эълон қилинди.
“Инсон тараққиёти индексининг турли даражаларига эга бўлган мамлакатларда саратон касалликлари сони кўпайишининг умумий тенденцияси турлича бўлади. Саратонга қарши курашиш учун энг кам ресурсларга эга бўлганлар глобал юкнинг асосий оғирлигини ўз зиммаларига оладилар”, — деб изоҳ берди ЖССТ саратон назорати раҳбари Фредди Брей.
2022 йилда тахминан 20 миллион киши саратонга чалинган ва хасталикдан 9,7 миллион киши ўлган. Ташхис қўйилгандан кейин беш йил ўтиб тирик қолганлар сони 53,5 миллион кишига баҳоланмоқда. Тадқиқотчиларнинг фикрига кўра, тахминан беш кишидан бири ҳаёти давомида саратон касаллигига чалинади. Тахминан ҳар тўққиз эркак ва ҳар ўн икки аёлдан бири ушбу касалликдан вафот этади.
ЖССТнинг глобал тадқиқоти шуни кўрсатадики, аъзо мамлакатларнинг атиги 39 фоизи ўз фуқароларининг асосий соғлиқни сақлаш хизматларининг бир қисми сифатида саратонни даволаш харажатларини қоплайди. ЖССТга аъзо мамлакатларнинг атиги 28 фоизи беморнинг азоб-уқубатларини камайтиришга қаратилган паллиатив ёрдамга муҳтож одамларга ёрдам беради.
2022 йилда дунё бўйлаб касалланиш ва ўлим ҳолатларининг учдан икки қисми саратоннинг 10 туридан келиб чиққан.
Ўпка саратони дунё бўйлаб энг кенг тарқалган саратон бўлиб, 2,5 миллион янги ҳолат (жами 12,4%) қайд этилган. Иккинчи ўринни кўкрак бези саратони (2,3 миллион ҳолат, 11,6 фоиз), учинчи ўринни йўғон ичак (1,9 миллион ҳолат, 9,6 фоиз), простата (1,5 миллион ҳолат, 7,3 фоиз) ва ошқозон саратони (970 минг ҳолат, 4,9 фоиз) эгаллади.
Мутахассисларнинг фикрига кўра, ўпка саратонининг юқори тарқалиши асосан Осиёда тамаки маҳсулотларини доимий равишда оммавий истеъмол қилиш билан боғлиқ. Бачадон бўйни саратони ҳам энг кенг тарқалган ўнта турга кирди. Бу 2022 йилда 661 044 янги ҳолат ва 348 186 ўлимни ташкил этди.
Изоҳ (0)