Ўзбекистон Бош консулхонаси томонидан Бирлашган Араб Амирликларида касал бўлиб, қийин аҳволда қолган фуқаро З.А.нинг ватанга қайтишига ёрдам берилди. Бу ҳақда “Дунё” агентлиги маълум қилди.
Қайд этилишича, ушбу инсонпарварлик кўмаги БААда истиқомат қилаётган ватандошлар ҳамда “Аёллар ва болаларга ёрдам кўрсатиш маркази” хайрия ташкилоти раҳбариятининг фаол қўллаб-қувватлови остида амалга оширилган.
Бош консулликка йўлланган мурожаат асосида З.А.нинг Ўзбекистонга қайтиши учун зарур барча ҳужжатларни расмийлаштириш ишлари ташкил этилган. Улар учун тўловлар ва мамлакатга қайтиш чиптаси учун тўловлар тўлиқ ҳомийлар томонидан қопланган.
8 февраль куни фуқаро Uzbekistan Airways компаниясининг Дубай—Тошкент йўналишидаги ҳаво қатнови билан Ўзбекистонга кузатиб қўйилган.
Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)