Россия Марказий сайлов комиссияси Борис Надеждинни март ойида бўлиб ўтадиган президентлик сайловларида номзод сифатида рўйхатга олмади. Бу ҳақда сиёсатчи номзодларни рўйхатга олиш комиссияси йиғилиши якунлари бўйича маълум қилди.
“Марказий сайлов комиссиясининг қарорига қўшилмайман. Мен бутун Россия бўйлаб 200 мингдан ортиқ имзо тўпладим. Биз имзо йиғишни очиқ ва шаффоф ўтказдик — бутун дунё бизнинг бош офисимиз ва йиғиш пунктларидаги навбатларни кузатди.
2024 йилги президентликка номзодим ҳаётимдаги энг муҳим сиёсий қарордир. Мен ниятимдан қайтмайман. Марказий сайлов комиссиясининг рад жавоби устидан Россия Олий судига шикоят қиламан”, — дейди Надеждин.
Борис Надеждин урушга очиқдан очиқ қарши чиққан ва Россия президентлиги учун курашаётган ягона сиёсатчи ҳисобланади. Унинг номзоди рўйхатга олиниши учун 100 ва 105 минг имзо тўплаши керак эди.
“Борис Надеждинни қўллаб-қувватлаган деярли 105 минг имзодан 95 минг 587 имзо ҳақиқий деб топилди ва бу унинг сайловда қатнашиш учун номзодини рўйхатга олиш имконини бермайди”, — деб хабар қилди МСК.
Изоҳ (0)