Россия Марказий сайлов комиссияси Владимир Путиннинг номзодини Россия Федерацияси президентлигига сайловда иштирок этиши учун рўйхатга олди.
Путин Россияда бўлиб ўтадиган президентлик сайловларида рўйхатга олинган тўртинчи номзод бўлди, деб ёзади “Интерфакс”.
Аввалроқ Марказий сайлов комиссияси “Россия Либерал-демократик партияси” раҳбари Леонид Слуцкий, Давлат Думаси вице-спикери, “Янги халқ” партияси аъзоси Владислав Даванков, шунингдек, Давлат думаси депутати (Россия Коммунистик партияси фракциясидан) Николай Харитоновни номзодлар сифатида рўйхатга олганди.
Путин сайловда ўзини ўзи кўрсатган номзод сифатида қатнашмоқда. Шу билан бирга, уни расман “Ягона Россия” партияси қўллаб-қувватлайди.
Владимир Путин бешинчи муддатга президентликка номзод сифатида кўрсатилишини 8 декабрь куни маълум қилди, 18 декабрь куни Марказий сайлов комиссиясига ҳужжатларни топширди.
Россия президенти сайловлари 2024 йил 15—17 март кунлари бўлиб ўтади.
Изоҳ (0)