Ўзбекистон бош консули Камол Икромов Бирлашган Араб Амирликлари Маданият вазирлигининг Дубайдаги бошқармаси вакили Анвар Ғолам Моҳамад Абдуллоҳ билан учрашув ўтказди. Бу ҳақда “Дунё” АА хабар берди.
Маълум қилинишича, мулоқотда Бирлашган Араб Амирликларида ўзбек маданияти марказларини очиш, биргаликда маданий тадбирлар ташкил этиш, шунингдек, ўзбек тилининг халқаро нуфузи ва жозибадорлигини ошириш масалалари кўриб чиқилган. Ўзбекистоннинг туризм салоҳиятини хорижий мамлакатларда, шу жумладан, БААда кенг тарғиб қилиш масалаларига алоҳида эътибор қаратилган.
Анвар Ғолам Моҳамад Абдуллоҳ Ўзбекистонда кечаётган ўзгаришларга юқори баҳо берар экан, эришилаётган ютуқлар жаҳон ҳамжамияти томонидан эътироф этилаётганини таъкидлаган. Унинг айтишича, Ўзбекистон ва БАА ўртасидаги ҳамкорлик истиқболлари барча соҳаларда улкан салоҳиятга эга.
Суҳбатдошлар БААдаги йирик кутубхоналар ва таълим муассасаларида Ўзбекистон бўлимларини очиш ва келажакда ўзбек тилини ўқитиш лойиҳасини йўлга қўйиш имкониятларини ҳам муҳокама қилган. Учрашув якунида Бош консулхона томонидан Бирлашган Араб Амирликларининг илмий марказлари, университет ва йирик кутубхоналари илмий базасини бойитиш мақсадида ўзбек тилидаги адабиётлар ва ўқув қўлланмаларини етказиб бериш бўйича келишувга эришилган.
Изоҳ (0)