Экология вазирлиги Абу-Дабининг Tadweer компанияси директори билан Ўзбекистонда чиқиндини қайта ишлаш ва ундан муқобил энергия олиш лойиҳасини муҳокама қилди. Бу ҳақда вазирлик матбуот хизмати хабар берди.
Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов ва Абу-Дабининг чиқиндиларни бошқариш соҳасидаги энг йирик Tadweer компанияси директори Али Ал-Дҳаҳери ўртасида учрашув 5 февраль куни бўлиб ўтди.
“Атроф-муҳитнинг чиқиндилар билан ифлосланиш даражасини камайтириш, чиқиндиларни қайта ишлаш орқали улардан самарали фойдаланиш муҳим аҳамиятга эга. Tadweer билан амалга ошириладиган лойиҳа эса бу борада кенг имкониятларни тақдим этади.
Лойиҳанинг аҳамияти шундаки, қаттиқ маиший чиқиндиларни утилизация қилиш орқали уларнинг ҳажми камайтирилади ва кимёвий моддалар зарарсизлантирилади. Шу билан бирга, чиқиндиларни ёқиш натижасида муқобил энергия ишлаб чиқариш ва иккиламчи моддий ресурсларни ажратиб олиш имконияти яратилади” — деди вазир Азиз Абдуҳакимов.
Учрашув давомида чиқиндиларни йиғиш, мониторинг тизимини жорий этиш, “яшил” энергия ишлаб чиқариш билан боғлиқ масалалар муҳокама қилинди. Вазир Tadweer компанияси вакилларига амалга оширилаётган ишлар учун миннатдорлик билдирди.
Маълумот учун, Дубайда бўлиб ўтган БМТнинг иқлим ўзгариши бўйича конференцияси (COP28) доирасида Tadweer компанияси билан меморандум имзоланиши лойиҳанинг муҳим босқичи бўлди. Лойиҳа Навоий, Бухоро вилоятлари ва Фарғона водийсига қаратилган техник-иқтисодий асослашдан бошланади, ҳар бир ҳудудда чиқиндиларни йўқ қилиш амалиёти ўрганилади.
Ушбу лойиҳа тозаланмаган чиқиндиларни полигонларга жойлаштиришни қисқартириш, янги иш ўринлари яратиш, атмосферага иссиқхона газлари ва заҳарли органик моддаларни чиқаришни камайтиришга хизмат қилади.
Изоҳ (0)