Хоразм вилояти Хива туманида қурилиш материалларини қиммат нархларда харид қилиш ҳолати аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Хива туман бўлими томонидан терговга қадар текширув ўтказилган. Текширув давомида туман ободонлаштириш бошқармаси масъул шахслари “А.қ.” хусусий корхонаси ҳамда “КН.Г.”МЧЖдан қурилиш материалларини бозор баҳосидан 571,8 миллион сўмга қиммат нархларда харид қилгани аниқланган. Шунингдек, ушбу субъектлар томонидан қурилиш ишларини амалга оширишда расмий ҳужжатларга сохта маълумотлар киритиш орқали 56,1 миллион сўм ўзлаштирилгани маълум бўлди.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Аввалроқ Сурхондарёда хусусий боғча қуриш учун ажратилган 356 млн сўм кредит маблағлари талон-торож қилингани тўғрисида хабар берилганди. Шунингдек, Тошкентда МЧЖ масъуллари мажбурий бадал учун тўланган 1,1 млрд сўмни ўзлаштиргани аниқланган эди.
Изоҳ (0)