Қозоғистон собиқ бош вазири истеъфога чиқишига муносабат билдирди

Қозоғистоннинг собиқ бош вазири Алихон Смоилов ҳукумат истеъфосига муносабат билдирди. Бу ҳақда Закон.кз хабар берди.

“Давлат раҳбари Қозоғистон Республикаси ҳукумати истеъфосини қабул қилди. Биринчи навбатда, президент Қосим-Жўмарт Кемелевич Тўқаевга Қозоғистон Республикаси ҳукуматига раҳбарлик қилишда кўрсатган ишончи учун чуқур миннатдорлик билдирмоқчиман. Бу икки йил жамият учун бурилиш даври бўлди. Давлат раҳбари янги “Адолатли Қозоғистон”ни барпо этишга қаратилган энг муҳим сиёсий ва иқтисодий ислоҳотларни бошлаб берди”, — дейди Смаилов.

Шунингдек, у ҳукумат фаолияти ушбу ислоҳотларни амалга ошириш ва Қозоғистоннинг барқарор ижтимоий-иқтисодий ривожланишини таъминлашга қаратилганини айтди.

“Ҳукумат ва маҳаллий ижро этувчи ҳокимият органларининг ҳаракатлари туфайли маълум натижаларга эришилди. 2023 йил якунига кўра, иқтисодий ўсиш 5,1 фоизни ташкил этди, барча асосий тармоқлар ижобий динамикани кўрсатди. Инфляция 2 баробарга камайди. Кетма-кет иккинчи йил тўғридан тўғри хорижий инвестициялар оқими сўнгги ўн йилликдаги энг юқори кўрсаткични қайд этди: уларнинг йиллик ҳажми 26-28 миллиард доллар даражасида бўлди”, — таъкидлади Смаилов.

Сиёсатчи Миллий жамғарма активлари 2023 йили 4 миллиард долларга ўсиб, 60 миллиард доллардан ошганини маълум қилди. Рейтинг агентликлари миллий иқтисодиётнинг суверен рейтинги ва инвестиция ишончлилигини тасдиқлади.

“Ҳукуматдаги барча ҳамкасбларимга, шунингдек, депутатлик корпусига биргаликда ва самарали меҳнат учун самимий миннатдорлик билдираман. Ўз меҳнати билан мамлакатимиз равнақига ҳисса қўшаётган барча қозоғистонликларга миннатдорлик билдираман”, — дея хулоса қилган Смоилов.

Қозоғистон ҳукумати 2024 йил 7 февралга белгиланган кенгайтирилган йиғилиш олдидан истеъфога чиқди. Роман Скляр вақтинчалик бош вазир вазифасини бажарувчи этиб тайинланди.