Ўзбекистонда Янги йил байрамидан кейин олма нархининг ошиши кузатилди — одатда бу даврда талаб камаяр эди. Бу ҳақда EastFruit таҳлилчилари маълумот берди.
Хусусан, 2024 йил январь ойининг биринчи ҳафтасида олма улгуржи нархлари ўртача 20 фоизга ошган ва 2023 йилнинг шу даврига нисбатан 29 фоизга юқори бўлган. Айниқса, Golden Delicious олмаси нархи кескин, бир ҳафта ичида 40 фоизга кўтарилган. Шу тариқа, ушбу олма навининг нархи Ўзбекистон бозорида тобора оммалашиб бораётган олманинг “Gala” навига тенглашди.
Энг машҳур ва арзон янги йил меваси — мандарин ҳам қимматлашди. Бир ҳафта давомида мандарин улгуржи нархи 13 фоизга ошган, бироқ бу мева ҳали ҳам нисбатан арзон — бир килограмм улгуржи сотувда ўртача 9 минг сўмдан сотилмоқда, бу бир килограмм учун 0,73 долларга тенг.
Таққослаш учун, энг арзон олма навларининг 1 килограмми 10 минг сўм ёки 0,81 доллар, Golden Delicious нави эса 14 минг сўм ёки бир килограмми 1,14 доллардан сотилмоқда.
“Эътиборли жиҳати сўнгги 12 йил ичида интенсив олма боғларига кўп миллионлаб инвестициялар киритилганига қарамай, Ўзбекистон олма импортчиси бўлиб қолмоқда ва бу меваларни мамлакатга импорт қилиш ҳажми ўсиши кутиляпти”, — дейилади хабарда.
Эслатиб ўтамиз, 2022 йилнинг январь—ноябрь ойларида Ўзбекистон 12 та хорижий давлатдан қиймати 11,4 миллион долларга тенг бўлган мандарин импорт қилган. Энг кўп мандарин импорт қилинган давлатлар рўйхатида Покистон биринчи, Туркия иккинчи ўринда — 3,6 минг тонна. Мамлакатдан ноябрда 500 тонна мандарин олиб келинган.
Изоҳ (0)