Нурободда салкам 125 минг доллар, Ургутда эса 2,3 млрд сўм кредит маблағлари талон-торож қилинди

Самарқанд вилоятининг икки туманида кредит маблағларини ўзлаштирган МЧЖлар аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Нуробод туман бўлими томонидан терговга қадар текширув ўтказилган. Тадбирда “С.Д.” фермер хўжалиги раҳбари С.Р. чорва молларни сотиб олиш ва чорвачиликни ривожлантириш мақсадида ҳудудий тижорат банки филиалидан ажратилган кредит эвазига сотиб олинган 1 250 бош қўйларни бошқа шахсларга сотиб юбориб, жами 124,6 минг доллар миқдоридаги кредит маблағларини талон-торож қилгани аниқланган.

Шу каби, департаментнинг Ургут туман бўлими томонидан ўтказилган терговга қадар текширувда “W.G.” МЧЖ раҳбари О.С. қишлоқ хўжалиги маҳсулотларини қайта ишлаш ва қадоқлаш учун ҳудудий тижорат банки филиалидан ажратилган 5 миллиард сўм кредитнинг бир қисмини бошқа кредит қарздорлиги учун йўналтириб, 2,3 миллиард сўмни ўзлаштириш йўли билан талон-торож қилганлиги аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Сурхондарёда хусусий боғча қуриш учун ажратилган 356 млн сўм кредит маблағлари талон-торож қилингани тўғрисида хабар берилганди.