Тошкент шаҳрида дарахтга электромобиль қувватлагичи ўрнатган фуқарога чора кўрилди. Бу ҳақда пойтахт экология бошқармаси хабар берди.
Ижтимоий тармоқларда Чилонзор тумани 16-мавзе 5-уй олдида 1 туп дарахтга электромобиль қувватлагичи бурама мих билан ўрнатилгани ҳақида хабар тарқалди. Мазкур ҳолат юзасидан Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси Чилонзор тумани инспекторлари томонидан ўрганиш ишлари олиб борилган.
Натижада фуқаро А.Х. томонидан туманнинг 16-мавзе 5-уй олдидаги 1 туп дарахтга электромобиль қувватлагичи бурама мих билан ўрнатилгани аниқланган ва вазият жойида бартараф этилган.
Юқоридаги ҳолат бўйича фуқаро А.Х.га Маъмурий жавобгарлик тўғрисидаги кодекснинг 79-моддаси 1-қисми (ўсимлик дунёси объектларини йиғиш, тайёрлаш ва улардан фойдаланиш тартиби ҳамда шартларини бузиш) бўйича маъмурий баённома расмийлаштирилиб, 1,7 миллион сўм жарима белгиланган ҳамда тушунтириш ишлари олиб борилган.
Аввалроқ Қашқадарёда канал қирғоғини реконструкция қилиш вақтида 150 та дарахт қўпориб ташлангани, Хоразм вилояти Шовот туманида дарахтлар кесиб, ёқиб юборилиши оқибатида 756 миллион сўм зарар етказилгани тўғрисида хабар берилганди. Шунингдек, Сирдарёда ариқларни бетонлаштириш жараёнида табиатга 232 миллион сўм зарар етказилган эди.
Изоҳ (0)