Сурхондарё вилоятида ўрмон хўжалиги ходимлари ўз ҳудудида ҳуқуқбузарлик содир этилишига йўл қўйгани учун жавобгарликка тортилди. Бу ҳақда вилоят Экология бошқармаси матбуот хизмати хабар берди.
Маълум қилинишича, Бойсун туман Экология бўлимига келиб тушган тезкор хабарларга асосан Бойсун давлат ўрмон хўжалиги “Хомкон” бўлими ўрганилган. Ўрганиш давомида мазкур бўлим ходимларининг ўз ишига совуққон муносабатда бўлганлиги ортидан 4 туп ўсувчанлигини йўқотмаган “Зарафшон” арчаси, 2 туп ўсувчанлигини йўқотган “Зарафшон” арчаси таг қисмидан кесилгани, шунингдек, 43 туп арча дарахтларининг ён шохлари кесилиб, шикастлантирилгани аниқланган.
Мазкур ҳолат юзасидан “Хомкон” ўрмон бўлими ходимларининг ҳар бирига нисбатан Маъмурий жавобгарлик тўғрисидаги кодекснинг 95-моддаси (табиий муҳитни тиклаш, табиий захираларни қайта ҳосил қилиш ва табиий муҳитга зарарли таъсир кўрсатиш оқибатларини бартараф этиш чораларини кўрмаганлик) 1-қисмига биноан маъмурий жарима қўлланилиб, табиатга етказилган 21 миллион 583 минг сўм зарарни қоплаш белгиланган.
Аввалроқ Хоразмда ўзини тадбиркор деб таништирган шахслар истироҳат боғидаги дарахтларни кесиб ташлаганди. Бухорода 22 туп қарағай ноқонуний кесилиб, табиатга 144,3 миллион сўмлик зиён етказилганди. Фарғонадаги чегара пости яқинида 12 туп манзарали дарахт қўпориб ташлангани хабар қилинганди.
Изоҳ (0)