Бош прокуратура матбуот котиби Фарғона вилояти Данғара туманида жойлашган автомобилларга газ тўлдириш шохобчасида фуқаролар ўртасида содир бўлган жанжал юзасидан маълумот берди.
Маълум қилинишича, 3 февраль куни Данғара туманида жойлашган автомобилларга газ тўлдириш шохобчасида уч нафар шахс ўзаро жанжаллашган. Шу пайтда безориликни олдини олиш мақсадида, уларни ажратиш учун келган 23 ёшли бошқа шахсга ҳам фаол қаршилик кўрсатилган. Бир оздан сўнг, ушбу шахс хушини йўқотган ва шифохонага олиб борилаётган вақтида вафот этган.
Олиб борилган тергов олди текшириш ҳаракатлари давомида Данғара тумани ИИБ ҳузуридаги тергов гуруҳи томонидан икки нафар шахсга нисбатан Жиноят кодексининг 277-моддаси (безорилик) билан жиноят иши қўзғатилган ва улар процессуал тартибда ушланган.
“Марҳумнинг ўлими юзасидан Данғара тумани прокуратураси томонидан терговга қадар текшириш ҳаракатлари олиб борилмоқда. Унинг ўлим сабабини аниқлаш мақсадида судга оид тиббий экспертиза тайинланган. Тергов ва текшириш ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади”, — дейилади хабарда.
Эслатиб ўтамиз, 2022 йил декабрда Оҳангарондаги газ қуйиш шохобчасида жанжал содир бўлганди. Ўрганишлар натижасида воқеа автомобилларга газ қуйиш жараёни ёки у ерда навбат талашган ҳайдовчилар билан боғлиқ эмаслиги аниқланган эди.
Изоҳ (0)