Ўзбекистонда Малайзиянинг йирик супермаркетлар тармоғи иш бошлаши мумкин. Бу ҳақда “Дунё” маълум қилди.
Хабар берилишича, Ўзбекистон элчихонасида Малайзиянинг KK Group of Companies компанияси асосчиси ва ижрочи директори Кин Чай билан учрашув бўлиб ўтди. Мулоқот чоғида Малайзия компанияси билан ўзаро ҳамкорлик муносабатларини ривожлантириш ва қўшма инвестиция лойиҳаларини амалга ошириш истиқболлари муҳокама қилинди.
Малайзия вакилига мамлакатда хорижий инвесторлар учун яратилаётган имкониятлар, бизнесни ривожлантириш учун тақдим этилаётган қулайликлар ҳақида батафсил маълумот берилди. Кин Чай ўз навбатида, Ўзбекистондаги ижобий иқтисодий ўзгаришларни юқори баҳолади. Жумладан, у хорижий инвесторларга берилаётган турли солиқ ва божхона имтиёзлари республикани улар учун жозибадор ҳудудга айлантираётганини таъкидлади.
“Биз мамлакатингиз ишбилармон доира вакиллари билан ҳамкорлик қилишдан манфаатдормиз, — деди у. — Малайзияда таниқли бўлган ва KK Super Mart бренди остида иш юритаётган супермаркетлар тармоғи Ўзбекистонда ҳам мавжуд имкониятлардан келиб чиққан ҳолда муваффақиятли фаолият олиб бориши мумкин”.
Учрашув якунида Ўзбекистонда мазкур компанияга тегишли KK Super Mart савдо дўконлари тармоғини очиш ва KK Group of Companies’га тегишли ҳудудда Ўзбекистон маҳсулотлари савдо уйини ташкил этиш тўғрисида келишувга эришилди.
Маълумотга кўра, KK Group of Companies кўп тармоқли компаниялар гуруҳи ҳисобланади. Компания озиқ-овқат чакана савдоси, электрон тижорат, меҳмонхона фаолияти билан шуғулланади, шунингдек, қурилиш соҳасида ҳам фаолият юритади. Унинг мамлакат бўйлаб 800 дан ортиқ савдо тармоқлари бор.
Изоҳ (0)