Россия қўшинлари назоратидаги Лисичанск шаҳри ўққа тутилиши оқибатида 28 киши ҳалок бўлди. Бу ҳақда ўзини ўзи мустақил деб эълон қилган Луганск халқ Республикаси (ЛХР) раҳбари Леонид Пасечник хабар берди. Маълумотни Россия ФВВ тасдиқлади.
ЛХР вакилларининг сўзларига кўра, Украина ҳарбийлари томонидан ўққа тутилиши оқибатида 3 февраль куни новвойхона биноси вайрон бўлган. Вайроналар остида 40 га яқин одам бўлиши мумкинлиги айтилмоқда.
“Россия Федерацияси Фавқулодда вазиятлар вазирлиги ходимлари томонидан 10 киши қутқариб олинди. Афсуски, 28 киши, жумладан, бир бола ҳалок бўлди”, — дейилади хабарда.
Лисичанскдаги новвойхона биноси қулаган жойда қидирув-қутқарув ишлари давом этмоқда. Леонид Пасечник 4 феврални Лисичанскнинг ўққа тутилиши қурбонлари хотирасига мотам куни деб эълон қилди.
Россия Ташқи ишлар вазирлиги расмий вакили Мария Захарованинг айтишича, Москва тегишли халқаро ташкилотлардан Киевнинг Лисичанскга ҳужумини қоралашини кутмоқда.
“Россия бу ҳақда халқаро ташкилотларга хабар беради. Биз тегишли халқаро ташкилотлардан тезда сўзсиз қоралашни кутамиз”, — дейди у.
Украина расмийлари Лисичанск ўққа тутилгани ҳақидаги хабарларга ҳозирча изоҳ бермаган. Россия назоратидаги Луганск ахборот маркази Украина новвойхонани АҚШ томонидан етказиб берилган HIMARS артиллерия ракета тизими ёрдамида ўққа тутгани ҳақида хабар берди.
Бу даво нимага асослангани номаълум бўлса-да, мазкур маълумотни тасдиқлаш имкони бўлмаган.
Портлаш жойидан олинган фотосуратларда бинода “Ресторан Адриатик” ёзуви бор. Лисичанскда ҳақиқатан ҳам Московская кўчаси, 167а-уйда жойлашган украин ошхонаси мавжуд. Маҳаллий аҳоли ҳам ижтимоий тармоқларда ресторан биноси ҳужумга учрагани ҳақида ёзмоқда.
Изоҳ (0)