Украинанинг Авдеевка шаҳри учун шиддатли жанглар давом этмоқда. Бироқ агар руслар шаҳарни эгаллашга муваффақ бўлган тақдирда, Украина деярли ҳеч нарса йўқотмайди. Бу ҳақда ҳарбий эксперт, “Айдар” батальонининг собиқ рота командири Евгений Дикий “Новинарня” нашрига маълум қилди.
Экспертнинг сўзларига кўра, Авдеевка кенг кўламли босқин бошланганидан бери Россия мудофааси ичида бўлган. Агар Россия фронт чизиғини тенглаштира олса, бу у учун осонроқ бўлади, лекин Украина учун Донецкни ўққа тутиш қийинлашади.
“Авдеевка ушлаб турилган вақтда у ерда иккинчи фронт чизиғи пайдо бўлганди. Аллақачон орқага чекиниш керак бўлган жой бор. Авдеевка тез бой берилган тақдирда, бу бошқача бўларди. Чунки негадир 2014 йилдан 2023 йилгача у ерда ҳеч ким иккинчи ёки учинчи фронтни ташкил қилмаган”, — дея тушунтирди эксперт.
Дикийнинг сўзларига кўра, мудофаа чизиқлари аллақачон тайёр, украиналик ҳимоячилар орқага чекиниш учун жой бор. Бахмутдаги жанг пайтида содир бўлган сценарий кузатилмайди. Бироқ ҳозир Авдеевкани ушлаб туриш жуда фойдали.
“Улар (руслар) Авдеевкага 40 минг кишини жалб қилгани биз учун фойдали. Шундай қилиб, бу одамлар бизнинг Купянск яқинидаги мудофаамизни кесиб ўтмайди, уларни Херсон вилоятига ўтказиб бўлмайди. Улар Авдеевкага боғланиб қолган, сабаби уларнинг ҳукумати (Кремль) шаҳарни босиб олишни буюрган”, — дейди у.
Мутахассиснинг айтишича, Авдеевкадаги украиналик ҳарбийлар учун жуда қийин, бироқ душман катта йўқотишларга учрамоқда. Шунинг учун шаҳарни иложи борича узоқроқ ушлаб туриш керак. Ҳаммаси Орловкадаги вазиятга боғлиқ бўлади.
“Авдеевкани ташқи дунё билан боғлайдиган ягона автомагистрал Орловка орқали ўтади. Бир неча ойлардан бери у отишма остида қолмоқда”, — дея мутахассис ва шаҳарни ушлаб туриш техника ташиш учун зарурлигини таъкидлади.
Изоҳ (0)