Ўзбекистонда 2024 йилнинг январь ойида истеъмол секторидаги товарлар ва хизматлар ўртача 0,6 фоизга ошди. Бу ҳақда Статистика агентлиги хабар берди.
Маълумотларга кўра, январь ойида озиқ-овқатлар 0,7 фоизга, ноозиқ-овқат маҳсулотлари 0,4 фоизга, пуллик хизматлар 0,9 фоизга қимматлашган. 2023 йилнинг январига нисбатан таққослаганда, ўтган 1 йилда озиқ-овқатлар нархи 9,3 фоизга, ноозиқ-овқатлар нархи 7,5 фоизга, хизматлар нархи 8,9 фоизга ошган.
Қайд этилишича, 2024 йил январь ойида асосий озиқ-овқат маҳсулотларидан сут (+0,5 фоиз) ва тухум (+2,5 фоиз) қимматлашган. Суякли мол гўшти (-0,2 фоиз), қўй гўшти (-0,2 фоиз), гуруч (-0,4 фоиз), буғдой уни (-1,8 фоиз), кунгабоқар ёғи (-0,9 фоиз), шакар (-0,3 фоиз) эса арзонлашган.
Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилган ва йил якунида йиллик инфляция 8,77 фоиз даражасида қайд этилганди. 2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Изоҳ (0)