Яккасарой ҳокими унга мурожаат қилиб, уй таъмири ва соғлиғидан шикоят қилган аёл хонадонига борди

Тошкент шаҳридаги ягона аёл ҳоким — Яккасарой тумани раҳбари Нилуфар Аллабергенова унга мурожаат қилиб, уй таъмири ва соғлиғидаги муаммолардан шикоят қилган мурожаатчи хонадонига борди. Бу ҳақда “Дарё”га ҳокимлик ахборот хизмати раҳбари Отабек Насимов хабар берди. 

Масъулнинг билдиришича, мурожаатчи хонадонида бўлган ҳоким масъулларга аёлнинг уйини таъмирлаш, ўзини эса даволатишга кўрсатма берган. 

Куни кеча Яккасарой туманидаги “Қушбеги” маҳалласида жойлашган 23-сонли кўп қаватли уйда истиқомат қилувчи Дилрабо Кубаева ҳокимликка мурожаат қилиб, яшаб келаётган хонадони таъмирталаблигини, соғлиғида муаммолари борлиги айтиб ёрдам сўраган эди. Фуқаро мурожаатини ўрганиш мақсадида туман ҳокими Нилуфар Аллабергенова ўринбосари – Оила ва хотин-қизлар туман бўлими бошлиғи Дилдора Исмоилжонова билан бирга унинг хонадонида бўлди. Ўрганиш давомида фуқаронинг барча мурожаатлари эшитилиб, масъулларга мурожаатчини “Аёллар дафтарига” киритиш, соғлигини тиклаши учун барча дори-дармонларини олиб бериш, уй таъмирини жамғарма ҳисобидан қилиб бериш ҳақида топшириқ берди, — дейди ҳокимлик ахборот хизмати раҳбари Отабек Насимов. 

Таъкидланишича, ҳоким маҳалланинг хотин-қизлар фаолига фуқаронинг мурожаатлари бўйича керакли ҳужжатларни ўрганиб, Оила ва хотин-қизлар туман бўлими бошлиғи Дилдора Исмоилжоновага етказиб бериши бўйича кўрсатма берган.

Эслатиб ўтамиз, Нилуфар Аллабергенова Яккасаройнинг собиқ ҳокими Анвар Сайфутдиновдан сўнг унинг ўрнини эгаллаб, пойтахт шаҳардаги ягона аёл ҳоким сифатида ишлаб келмоқда. У 2019 йилдан ҳокимликка қадар Яккасарой тумани прокурори сифатида фаолият юритиб келган.