Украина президенти Владимир Зеленский Украина Қуролли кучлари бош қўмондони Валерий Залужнийни четлаб ўтиб, айрим қўмондонлар билан музокара олиб бормоқда. Бу Залужнийга бутун армияга қўмондонлик қилишига тўсқинлик қилмоқда.
“Украинская правда” нашри Зеленский ва Залужний ўртасида ноябрь ойининг бошидан буён ривожланиб бораётган эҳтимолий конфликтни ўрганиб чиқиб, мақола чоп этди. Украина президенти ва унинг офиси Қуролли кучлар бош қўмондони билан кескинлик мавжудлигини рад этади.
“Баъзида Зеленский икки турдаги Қуролли кучларга эга деган таассурот пайдо бўлади: ‘яхши’ — Украина Қуролли кучлари шарқий қуролли кучлари гуруҳи қўмондони Александр Сирский қўмондонлигидагилар ва ‘ёмон’ — Залужнийга бўйсунадиганлар. Бу бош қўмондонни жуда заифлаштиради ва энг муҳими, уни бутун армияга қўмондонлик қилишига тўсқинлик қилади”, — дейди нашр суҳбатдошларидан бири.
“Украинская правда” манбаларига кўра, Зеленский Залужнийни четлаб ўтувчи турли хил ҳарбий бўлинмалар қўмондонлари билан мулоқот қилиш учун “параллел йўллар”ни яратган. Қўмондонлар билан тўғридан тўғри алоқа Зеленскийнинг ишини тезлаштиради, лекин Украина Қуролли кучлари бош қўмондони ишини беқарорлаштиради, у ўзининг расмий қўл остидагиларидан баъзи маълумотларни билиб олади, деб таъкидлайди нашр.
Томонлар ўртасидаги келишмовчиликларга мисол тариқасида ҳарбий комиссарларнинг ишдан бўшатилиши келтириб ўтилади. Бу сафарбарлик режаларининг бузилишига, бир қанча қўмондонларнинг ишдан бўшатилишига олиб келиши мумкин эди.
“Уларнинг ишдан бўшатилиши қўмондонлик вертикалига беқарорлик киритади”, — дейилади хабарда.
Аммо президент ва Украина Қуролли кучлари бош қўмондони ўртасидаги зиддият асосан жанубда қарши ҳужум бошланганидан кейин кучайди.
Ноябрь ойи бошида Залужний Economist журналига ёзган мақоласида Украина — Россия уруши “тинкани қуритувчи” босқичга ўтаётганини айтганди. Украина президенти эса очиқчасига унинг фикрига қўшилмаган. Кейинроқ, Британиянинг Сун газетасига берган интервьюсида Зеленский сиёсат билан шуғулланмоқчи бўлган ҳарбийлар “урушга аралашмасликлари” кераклигини айтган.
Тhе Economist газетаси хандақ урушининг даҳшатли ҳақиқати билан бир қаторда Киевдаги “сиёсий жанг майдони” тобора кескинлашиб бораётгани, Зеленский Залужнийда рақибни кўраётгани, сиёсий тортишувлар Украинага зарар етказишини ёзганди.
Зеленский ва Залужний ўртасидаги зиддиятнинг табиати уруш ва сиёсатнинг аралашувидан келиб чиқади. Зеленский армия раҳбариятига сиёсат элементларини, яъни Залужнийнинг масъулият соҳасини олиб келди. Шу билан бирга, Украина Қуролли кучлари бош қўмондони ўз хоҳишисиз сиёсий жараёнга киришди.
Россиянинг ҳужумидан олдин ва бошида Зеленский расмий бош қўмондон сифатида, масалан, йўллар қуриш ёки олигархларга қарши курашдан кўра, ҳарбий мавзуларга камроқ эътибор берган. Бироқ, урушнинг икки йилида Зеленский олий қўмондон сифатида ҳарбий режалаштириш ва қўмондонлик билан шуғуллана бошлади.
“Зеленскийнинг офиси Залужнийнинг истеъфога кетиши имкониятини кўриб чиқмоқда, бироқ бу Украина президентининг карьерасига таъсир қилиши мумкин”, — дейилади хабарда.
Изоҳ (0)