Украина Қуролли кучлари бош қўмондони Валерий Залужнийнинг кабинетида овоз тинглаш мосламаси топилганидан сўнг Украина Хавфсизлик хизмати жиноий иш қўзғатди.
УХХ таъкидлашича, қурилма Залужнийнинг офисида эмас, балки “келгусида у иш учун фойдаланиши мумкин бўлган” хоналардан бирида топилган. Махсус хизмат, шунингдек, маълумотни сақлаш ёки масофадан узатиш учун ҳеч қандай қўшимча воситалар топилмаганини, қурилманинг ўзи эса ишламаслигини таъкидлади.
“Украинская правда”нинг УХХдаги манбаларига кўра, қурилма 17 декабрь куни Залужний кўчиб ўтмоқчи бўлган кабинетни текшириш чоғида топилган. Нашр манбалари бош қўмондоннинг айрим ёрдамчиларида ҳам тинглаш мосламалари топилгани ҳақида хабар берди.
Украина мудофаа вазирининг собиқ ўринбосари Анна Маляр телефон суҳбатлари тингланиши ҳақидаги хабарларга изоҳ берар экан, буни жиддий эмас деб атади, чунки мулоқот чоғида ҳарбийлар доим маълумотларнинг тарқалиши эҳтимолини ҳисобга олиб суҳбатлашади.
Ноябрь ойидан бери Украина ва хорижий оммавий ахборот воситалари Украина президенти Владимир Зеленский ва Украина Қуролли кучлари Олий бош қўмондони Валерий Залужний ўртасида эҳтимолий можарони муҳокама қилмоқда. Ҳаммаси Залужнийнинг The Economist газетасига берган интервьюсидан бошланди, унда бош қўмондон уруш боши берк кўчага кириб қолгани ва бир неча йиллар давом этиши мумкинлигини айтганди. Ўз навбатида, Украина президенти Залужнийнинг баҳосига очиқчасига қўшилмади ва ҳарбийлар сиёсат билан шуғулланмаслиги кераклигини айтди.
Зеленский офиси мамлакат ҳарбий ва сиёсий раҳбарияти ўртасидаги бўлинишни рад этмоқда.
Изоҳ (0)