Ўзбекистонда камида 68 нафар боланинг ўлимига сабабчи бўлган “Док-1 Макс” сиропи бўйича давом этаётган судда бухоролик жабрланувчи Ғофуржон Раҳимов сўз олиб, вафот этган болалар орасидан келажакда президент, бош вазирлар чиқиши мумкинлигини айтиб, афсусдалигини билдирди. Бу ҳақда судда қатнашган “Дарё” журналисти хабар берди.
Маълум бўлишича, Ғофуржон Раҳимов 2020 йил 28 декабрда туғилиб, 2 ёшида шамоллашдан соғайиш мақсадида қабул қилган “Амбронол” сиропи сабаб кўрмайдиган, эшитмайдиган бўлиб қолган Мухторжон Мирраҳмоновнинг отаси ҳисобланади.
Ўғлим шамоллаб қолгач, маҳалладаги поликлиникага олиб чиқдик. Патронаж ҳамшира антибиотик қиламан, деди. Ўғлим уколдан қийналмасин, деб сиропми, таблетками ёзиб беринг дедим. “Қуёнчали Амброксол олинг, ўша яхши”, деди. Дори олиш учун аёлимни дорихонага жўнатиб, ўзим ўғлимни олиб, уйга қайтдим. Маҳалламиздаги дорихонада “Амброксол йўқ, ўрнига Амбронол бор. Одамлар ичиряпти, яхши”, деган.
Олиб келиб, 3 кун ичирдик. Шундан сўнг боламда қусиш бошланди. Ерга урса, кўкка сапчийдиган бола умуман овқат емай қўйди. Фақат ётади, сўрғич сўрайди. Бутилкадан сут ҳам ичмай, қўшимча овқат ҳам емай қўйди. Тез ёрдамга олиб борсак, икки кундан бери бола сиймаяпти, нима қилиб юрибсан, дейишди. Шифохонанинг жонлантириш бўлимига олиб бордик. У ерда “Биз бу касалликни даволай олмаймиз, гемодиализ йўқ”, дейишди. Вилоятга бор дейишди. Вилоятда эса ёш болалар учун катетер йўқ экан. Буни биз даволай олмаймиз, Тошкентдаги 16-“балница”га олиб боргин деб, жўнатиб юборишди, — дейди жабрланувчи ота.
Отанинг маълумот беришича, Тошкентдаги шифохонага олиб келинган ўғли 2022 йилнинг 30 декабрь куни комага тушиб, 2023 йилнинг март ойларида комадан чиққан.
Ҳар куни “дўхтир”дан сўрайман. Команинг ҳам ҳар хил кўриниши бор экан. Иккига тушиб қолди, учга тушди, тўртга тушди, тайёргарлигингни кўр дейишди. Бу ҳолатни ҳеч кимга раво кўрмайман, — дейди ота.
Билдирилишича, Мухторжон Мирраҳмонов комадан чиққач, кўрмайдиган, эшитмайдиган ногиронга айланган.
Қарзларим кўпайиб кетди. Кеча давлатдан яна 350 миллион сўм кредит олиб, ўғлимни Ҳиндистонга юбордим. Қулоғини даволаса бўлади, аммо кўзини даволаш қийин дейишмоқда. 20-30 фоиз кафолат беришмоқда, — дейди Ғофуржон Раҳимов.
Отанинг қўшимча қилишича, боласининг даволаниши учун у 100 минг долларга даъво қилади.
68 та итни ҳам ўлдиришнинг иложи йўқ-да. Одамнинг раҳми келади-да. Шу болалардан кимдир чиқиши мумкин эди. Президент, сенат, бош вазири чиқиши мумкин эди. Қириб ташладилар. 68 нафар болани қириб ташлаш — вахшийликда. Кўпроқ жазо бериш керак, — дейди у.
Изоҳ (0)