Ўзбекистонда 68 нафар боланинг ўлимига сабабчи бўлган, шамоллашга қарши қўлланган “Док-1 Макс” сиропи бўйича жиноят иши кўриб чиқилаётган судда яна бир судланувчи босимга учраганини маълум қилди. Шу сабаб унга нисбатан суд тиббий экспертизаси тайинланди, дея хабар берди “Дарё” мухбири.
Таъкидланишича, суднинг 2024 йил 29 январь куни давом этган навбатдаги мажлисида Quramax Medical МЧЖ директори, ҳиндистонлик судланувчи С.Р.П. сўз олиб, терговда босимга учраганини билдирди.
Судланувчи С.Р.П.нинг унга нисбатан ноқонуний хатти-ҳаракатлар амалга оширилгани тўғрисидаги кўрсатувларидан сўнг ажрим қилади. Судланувчининг соғлиғи ҳолати юзасидан суд тиббий экспертизаси тайинлансин. Экспертиза ўтказиш Ўзбекистон Республикаси Соғлиқни сақлаш вазирлиги Республика суд тиббий экспертиза илмий-амалий маркази Тошкент шаҳар филиали экспертлари зиммасига юклатилсин, — деди судлов ҳайъати раиси Мусо Юсупов.
Судья мутахассисларга бир нечта топшириқ бериб, “Судланувчининг танасида шахсни қийноққа солиш вақтида олиши мумкин бўлган тан жароҳати ва уларнинг излари мавжудми, агар мавжуд бўлса, уларнинг етказилган муддати, жойлашган ўрни ва механизми қандай, тан жароҳатлари қандай предмет таъсирида етказилган бўлиши мумкин, мазкур тан жароҳатларини ўзига ўзи етказган бўлиши мумкинми каби саволларга жавоб топишни буюрди.
Суд тиббий экспертизаси 2024 йилнинг 30 январь куни ўтказилади.
Аввалроқ Фармацевтика агентлигининг “Док-1 Макс” бўйича судланаётган собиқ раҳбари ўзига нисбатан босимлар бўлганини айтгач, унинг соғлиғи ва танасидаги жароҳатларни аниқлаш мақсадида суд тиббий экспертизаси тайинланганди, бироқ экспертиза давомида унинг танасида жароҳатлар аниқланмагани маълум қилинганди.
Изоҳ (0)