“Док-1 Макс” иши бўйича яна бир гувоҳ айбланувчи сифатида қамоққа олинди. У тергов қилинаётгани учун суд бир ой муддатга танаффус эълон қилди

“Док-1 Макс” иши бўйича судга гувоҳликка чақирилган Фаррух Толипов қамоққа олинди. Унга нисбатан тергов ҳаракатлари бошлангани учун сироп ишини кўриб чиқаётган суд бир ой муддатга танаффус эълон қилди, дея хабар берди “Дарё” журналисти. 

Мазкур суд ишини кўриб чиқаётган судья Мусо Юсупов бошчилигидаги судлов ҳайъати, бугун, 1 декабрь куни бўлиб ўтган навбатдаги суд мажлисида адвокат Темур Раҳматов томонидан киритилган илтимоснома қаноатлантирилганини эълон қилди. 

Тергов органи томонидан Толипов Фаррух терговга жалб қилиниб, 2023 йилнинг 23 ноябрь куни Жиноят ишлари бўйича Олмазор туман судининг ажрими билан унга нисбатан қамоққа олиш тарзидаги эҳтиёт чораси қўлланилган. Толиповга Жиноят кодексининг 186-3-моддаси 3-қисми “а” банди (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш, шунингдек, таркибида кучли таъсир қилувчи моддалар мавжуд бўлган дори воситаларини ресепт бўйича чакана реализация қилиш тартибини бузиш) билан айблов эълон қилиниб, тергов кетмоқда. Адвокат томонидан келтирилган илтимосномада тилга олинган ҳолатлар айбловда мавжуд, — деди судья Мусо Юсупов бу ҳақида гапирар экан. 

Судда тушунтирилишича, мазкур ишдаги бир ойлик танаффус ушбу жиноят ишига алоқадор янги шахслар тергов органи томонидан айбланганлиги ва бошқа асосларга кўра белгиланган.

Фармацевтика агентлигининг собиқ раҳбари С.К.нинг адвокати Темур Раҳматов томонидан киритилган илтимосномада Жиноят процессуал кодексининг 417-моддасига асосан судда сўроқ қилинган Улуғбек Эгамовга (Фармацевтика агентлигининг собиқ раҳбари С.К.нинг биринчи ўринбосари сифатида, кейинчалик Фармацевтика агентлиги директори сифатида ишлаган) нисбатан жиноят иши очиш ҳақида прокуратурага хабарнома бериш сўралганди. Шунингдек, яна бир гувоҳ Умид Темиров (Фармацевтика агентлигининг собиқ раҳбари С.К.нинг ёрдамчиси вазифасида ишлаган)га нисбатан ҳам жиноят иши очилиши сўралганди.